مكتبة الشاعر ابراهيم ابنعوف

[احمد كسلا]

نبذة عن المبدع ابراهيم ابنعوف

نفرد هذه المساحه لكلمات الشاعر الفذ الأستاذ

إبراهيم أبنعوف

الإسم / إبراهيم ابنعوف عمر عبد الكريم

من مواليد أوسلى فى يونيو 1952
متزوج وله خمسه أبناء وهم

(آذار ـ سامر ـ عمر ـ سامرين ـ ميسون )

موظف سابق بالغابات

شكل ثنائيه مع الراحل المقيم / يس عبد العظيم من العام 79 حتى وفاته فى العام 87
غنى له الراحل المقيم مجموعه من الأغنيات منها (ليل الغلابه ـ كيفن أصبر قليبى ـ مناى شوفتك كل ساعه التى تغنى بها أخيراً الأستاذ صديق أحمد
وأيضاً الأستاذ عبد المنعم فارس (الله عالم ياحبيبا ـ مرارة اللقيا ـياعالماً بالخفايا ـ وأخريات )
ومن قبل هؤلاء غنى له النعام آدم وعثمان اليمنى ومحمد جباره وعبد الرحمن البركل وأخيه عبد الرحيم البركل وعثمان عبدالعظيم
وتغنى له أيضاً الأستاذ عبد الغيوم الشريفى بعدد كبير من الأغنيات أمثال التحدى وغيرها
إنه مدرسه شعريه قائمه بذاتها
فالنعطه بعضاً من حقوقه علينا
بنشر كلماته فى هذا البوست المخصص له
كل من يملك مجموعه من قصائده عليه إنزالها فى هذا البوست ليكن تقديراً وعرفاناً لشاعرنا الكبير
الأستاذ / ابراهيم أبنعوف

[احمد كسلا]

لاسلامك لاكلامك

لاسلامك لاكلامك لا ابتسامك منو اقنع
يا ام اهدتنى العواطف ويا اخت شايلانى مقنع

اوعي يوم يخطر ببالك انو احيد عن دربك ارجع
او اساوم فيهو حبك حتى لو لي روحى ادفع
اسمى من كل المشاعر واغنى مما هو الله انفع
لا لا ما كلت خطاي اقوى من ايامنا واسرع

ياحياتى وسر وجودى وياغناى البيهو اسجع
كل ماغابت عيونك منى دافع الالفة يدفع
اطرا نجوانا وحكانا والامانى اللينا مرتع
والبراءة الراسمة حسنك تحكى يوم ما كنا شفع

ياريت احلامنا تصدق بي لقانا ولينا تجمع
وتبقى لينا الدنيا حلوة تصفي للبان المزعزع
نشتل الايام مشاتل ريدة من الروعة اروع
لا الزمان يبعد خطانا لا تشى اقدارنا تمنع

يابعيدة وماك بعيدة ياقميرة تغيب وتطلع
تملى بلداتك محنة خلى ليل حرمانى يسطع
فيهو واوحشة غيابك بي صحى النوم المقطع
انظرينى فى كل حالة كلمينى وليكى بسمع

ليك سلامى واشتياقى قدر ماالله فيك ابدع
ثم فائق احترامى حبي ليكى قبيل وهسع
ليكى ياقبلة رجاي ياشفا القلب الموجع
اقبليهم وارضى عنى كلمينى قلوب ومقطع

[احمد كسلا]

شديرة الحـن

وصيتونا عشـان مـا ننسـي وللا شديرة الحـن تتحتحـت
ردوا البال عشـان نتزكركـم وينو البال؟؟ البال ما اتشتـت
احكي عن الاشـواق القـادت روحي علـي جيهتكـم قفـت
وللاّ دمـوع العيـن الجاريـة بي فرقتكم ويـوم مـا جفـت
بي شوفتكـم أطمـن نفسـي كلما العين خدَعتنـي ورفـت
حوّق صبري علـي أحزانـي لاحـاق لا الأحـزان اتكفـت
واغرب شي انه أيامنا بترحـل وتبقي معاي بي رغم رحيلـك
وانك ساكني مكامـن شعـري وخجلان شعري عشان يحكيلك
وانّـهُ القـدر الفـرّق بيـنـا اقسم مـا يدينـي... بديلـك
وانّـه جنـان الدنيـا تنـادي ويفضل قلبي مصاقـر ويلـك
والأغـرب مـن داكـا كأنـك الهـة الحـب فـي الرّومـان
كم عاشق هام فـي محرابـك وكـم قلـب اتقـدم قـربـان
وأنا في موقف شاعر مرهـف لا يعـرف للحـب عصـيـان
الا كمان محتـار فـي أمـرو وفـي كفـراً عانـق ايمـان
وما تنسي اني هويـت هـواكي وأمسي هواكِ علي زي ديـن
في كل شاردة انـادي عليـك وفي الواردات من صدقي حنين
يا فرحي المارق مـن حزنـي ويا حزنـي الجـواي دفيـن
سبحان من رسمك في روعـة وأنشأك من موية ومن طيـن
أنقري بـاب الزكـري أكنـك يفتح وادخلي من غير مرقـة
غنـي صـدا ايامـاً منسيـة ولا مسي الوتر الماب يندقـة
أسألي شارعاً دسـا الخاطـر يبقي يجاوبـك يبقـي ويبقـي
كيفـن كنتـي منـورة ليلـو وكنتي صباح العيد في الشرقة
وكانت فـي عينيـك أحلامـي تشرق وطيفها يلـون كونـي
أرحل فيها رحيـل لا رجعـة مجروح وكان الله في عونـي
رغماً دربك مـا كـان دربـي وانتي اخترتي السكة الدونـي
ياني العايشك نبض جراحـي وحزن غناي وزي ما حتكوني

[احمد كسلا]

أعز إنسان


يا أعز إنسان .. لىّ أنا يـا أعـزّ إنسـان
مانى غريب عليك .. يى عاشقك .. الولهان
جيتك ومن سجون الريد بدور لـي ضمـان
ماتصارحنـى قولـي لـي بكـل .. أمـان
فـي قلبـك دحيـن خاتينـى ياتـو مكـان
قربتك .. وبينك وبينـي .. كانـوا أزمـان
طريتك .. وفكري في عالم مـن النسيـان
خاشع مبتهـل طالـب الإلـه .. سبحـان
يجمع روحي بي روحك .. يعيشوا أخـوان
بريدك وريدتى ليـك ريـدة عيـان وبيـان
وقولة أنساك عندي بعيـدة فـي الحسبـان
كل الدنيا مـن غيـرك .. أشوفـا هـوان
وحتى أفراحي فيها غيـرك تبقـى هـوان
أشيلك في عيونـي عليـك أظـل سهـران
وأسكب ذاتي في ذاتـك .. وأجيـب أوزان
أردد في حـروف أسمـك بـراى نشـوان
يعقب فـي صـداه معـاى .. كُـل لسـان
أخلى الكون فرح يرقـص معـاى طربـان
تغنـى طيـوره تتمايـل مـع الأغـصـان
ليه بغنـاك مـا أكسـى الوجـود ألـوان
وأنا المكتوب لي ( أحبك ) وليك أعيش فنان
تعالى وضمي صدري عليـك بـي تحنـان
ورجّعى عمري وكتين كـت مـع الحبيـان
بيكى نسيت شقاي .. وكل العـذاب الكـان
وفيكى لقيت حنـان أمـي الفقدتـو زمـان

[احمد كسلا]

العيد مبارك

العيد مبارك والمراد ينتم حبيبى
ونقابل الجاى فرحانين نفارق الهم
فى بعدك بقاسى المرة وأتألم
واتصبر واقول المولى ليا قسم
أأخر فى شبابى الفات ويتقدم
ألا بس ما عارفو من عمرى المفضل كم
حبيبى بتعذب عشان عينيكى ما بندم
وغيرن ما شكيت لى زول ولا أتظلم
فى حورن بشوف سعدى وشقاى متلم
وريدن يجرى فى أعماقى مجرى الدم
حبيبى أساسق فوق دريب وصلك ولا بنجم
من شوقى العليك لى يأسى ما استسلم
كلما أمالى فيك قدامى تتهدم
أرجع بدموعى ... وبكرة فيك اعشم
حبيبى اجيك مشتاق وأقول بالبيا اتكلم
وانسى انا لما اشوف عينيكى تتبسم
اخشى انا فى عتابى معاك أتلوم
أنت زعلك ما بدورو وما بدورلك هم
حبيبى واشوفك زى عيونى ومن عيونى أعظم
ومنو الفى خاطرى صورته وفى لسانى نغم
غيرك أنتى ياالغيرك حياتى عدم .

[احمد كسلا]

فرحة المحزون

ضميـنـى ضميـنـى يــا فـرحــة الـمـحـزون
لا الصبر قادر اطيق لا الضم معاهو سكون
يـا عايشـة فـى جـواى بيكـى الفـؤاد ملـيـان
انـا مـن بعيـد جاييـك شـارد مــن الاحــزان
غفلتـا قــدرى وجـيـت لاقيـنـى بالاحـضـان
لفينـى فـى جيـدك طــوق والبسيـنـى كـمـان
ورينـى كيـف بيكـون دفء الحـنـان بحـنـان
ما انتى لى وانـا ليـك رغـم اليكـون والكـان
انــا شـاعـرا غـنـاك فـــى اروع الالـحــان
وانا بين يديـك فنـان والفـن جنـون و جنـون
شن داير اقولـك عـاد مـا القـول علـى تقيـل
انـا والنجـوم شـهـاد مــن ديــل اتـابـع ديــل
تنكش كلاب الشوق فى جوفى طـول الليـل
لامـن لحقتـا المـوت المـوت ابـانـى عـديـل
يـومـا يلمـنـى فـيـك يـومـا صـعـب بالحـيـل
كـتـرتـلـو التـحـنـيـس كـمـلـتــو الـوســيــل
حـلـفـتـو بـالـقــران خـصـمـتـو بـالانـجـيـل
وناديتـو مـن سجيـل خيـب رجــا الممـكـون
ولهـان عليكـى قليـب يهـواك يحبـك مــوت
صبـرتـو بـالآمـال صـبـرا غزلـتـو خـيــوط
شـان مـا يميـل للغيـر كرهتـو فـى البـنـوت
وسـدتــو بـالاحــلام ختـيـتـو فـــى تـابــوت
رهبنتـو ليـك رهبـيـن فـوّتـو فــوت الـفـوت
حفظتـو زكــر الـريـد يـذكـر مغـيـب يــوت
لامــن بقـالـو كــلام لامــن بقـالـو سـكـوت
ونزرا على مكتوب والله يكـون فـى العـون
سامحينى كـان ذليـت وكلامـى مـا ارضـاك
الناس تسامح الناس وانتـى السماحـة بـراك
يــا رقـــة الحـلـويـن يـــا قـســوة الـقـسـاك
بـى زاتـك اتوسـل طالـب عفـوك ورضـاك
مديـلـى حـبـل الـريـد قويـهـو مـــن تـــالاك
خلينـى اكـون عايـش علـى انـى يـوم القـاك
يبقـى السعـد يصـدق وتمـسـك يـدايـا يــداك
وا شوقـى لليـوم داك يــوم يقـعـد الـمـاذون

[احمد كسلا]

شيلنـى .. يـا ليـل الغـلابـة .. ولِمـنـى
لفنى .. أبلعنى فـي جوفـك هنـاك وضمنـى
.. ضمنـي الـيـل الغـلابـة ..وضمـنـى
أنـا بسألـك بالفيـك مسـك قلبـو وشـهـق
بالبيبـكـى ودار تشـقـه العـبـرة طـــق
بالكتـم ســر حـبـو لا بــاح لا نـطـق
قول لى مخلوق حظى منك ولا من حظى اتخلق
إنتـظـر حدثـنـي لا تـعـجـل تـفــوت
يبقـى مـا تلقـانـى بـكـرة وراك أمــوت
ودا إن حصـل ألبـس ســوادك وحـدّنـى
مالـك استغربـت يـا ليـل فــي الـكـلام
مـاك عـارف الدنيـا فـي عينـي ضــلام
والقليـب عميـان يفـتـش فــي الـزحـام
لـى قلوبـاً طيبـة مـا عـرفـت خـصـام
وفـى زمنـا الطيبـة راحـت ومـا اتلـقـت
وفـوق دريبـا جريـت والكرعيـن حـفـت
والبقول يمسح دمـوع عينـى يذيدهـا يتمنـى
ان بقيـت ودرت اسمـي تعـال لـي جـاي..
ما انا الزول المسطر فوق جدار صمتك غنـاي
ماانا الروح المعذبة في منامي وفـي صحـاي
ماانا الفي الواطا قاعد وشايفه فوق نجمك مناي
ليـك حـق لـو ماعرفتـنـي مـيـن انــا
انـا ماالوليـد الشفتـو قـبـال كــم سـنـة
وهسةجيت لقيتو فـوق عصـا الريـد متحنـي
ماغريـب الحـب يقـرض الـزول قــرض
انا ياني واحـدا فـي حطامـه علـي الارض
بس الغريب انـه الظـروف تفـرض فـرض
الا اعيـش فـي دنيـا لاطــول لاعــرض
والقـدر يلعـبـي بـيـن يمـنـه وشـمـال
وابقي زي عصفور كسيـح فـي ايـد عيـال
كيـف يطيـر ؟! وجناحـو مكسـور منتنـي
ليلـي اسـرع بـي تعـال شــد الـرحـال
لـي عوالـم بيـن نجومـك مـن .. خـيـال
يبقي اصـادف بختـي بيـن طرقاتهـا ضـال
أجيبه أرجـع أجـي ألقـي ظلـم الدنيـا زال
.. يـلا قٌبّـال تطفـي شمعـاتـي الـريـاح
وقبلمـا يـنـزل عـلـي الدنـيـا الصـبـاح
وقبلـمـا تـنـزل مصيـبـة .. تخـمـنـي

[احمد كسلا]

زولي الوسيم


يازولي الوسيم ليه البعاد وايه لازم الجفا البعد الوداد



علي حبي العظيم وإخلاصي ليك إنت ليه جازيتني بالنوح والسهاد

ما راعيت لي قلبي الجرحتو ولا دمعي الطفر بلَ الوساد

قصدت عذابي ما هماك رضاي وكم لرضاك جافيت العباد

لو لي نار غرامك ديمه صالي برضي أحب تكون لي النار مهاد



لو فكرت إني بحب سواك يمين لي سواك ما لان الفؤاد

كيف أعشق بلاك وقلبي عندك ومعاك لا عندي قدرة ولا مراد

إن أجبرت قلبي عشان يسيبك يعاكسني ألقي في إخلاصو زاد

تطيب لي العيشه قربك لو صعيبه وبلاك تضيق بي ما رحبت بلاد



أحاول النوم أقول في الطيف أقبالك لكن للجريح صعب الرقاد

شاحب لوني أصبح جسمي هيكل التقول في الدنيا مخلوق قبل عاد

انا الليلي ونهاري بقوا لي ليل ما بشوف في الدنيا من غير السواد

جفاني صباحي زي ما إنت جافي ولاَ صباحي في محياك يعاد



حكيت الكافر الفي النار مخلد ينضج جسمو يلقي التاني عاد

لو كان ما الدموع الفيها عايم بدري كان جسمي إحترق أصبح رماد

وراك متحسر أبكي علي صباي لا رجع الصبا لا الماضي عاد

وياريت يوم رحلت بعدت عني كان في الدنيا آخر لي زاد



أبت أيام هناي تعودني مره وأكون محظوظ من الناس السعاد

بعد ما صاح غراب البين وقال لي رجوعك وشوفتي ليك أمور بعاد

صريع الحب خلاص أيامي تمت وخلاص في سبيلو أكملت الجهاد

حضروا نعشي وأكتبو فوق قبري شهييد الحب قتيلك يا وداد

[احمد كسلا]

قلب السجم


غناء المبدع / عبد الرحيم البركل


يا قلب السجـم يـا المـا لقيتلـك هـادى
برغم الحصل ليـه فـى الغـرام متمـادي
كر قبلك وبراك ياالليـل زمـن ماعـادى
قول لى شن وداك فى قبضـة الصيـادى
يا قلبـى العنيـد لمتيـن تصيـح وتنـادى
والتهواهـو منـك راح مقـبـل غــادى
فات خلاك وحيد فوقـك همـوم متـرادى
لى محنا متل سحـب الخريـف متقـادى
ان كان ماك شقى وداير عذابى وراضـى
آيه لاقيهو فـى حبـوا الدرعتـو قـلادى
تنسج فى الأمانى وفـى خيوطـا تسـادى
فى واديك تتوه والنـاس بعيـد فـى وادى
جاك صايبا جديد عكـر صفـاك الهـادى
ولاّ ده جن عديل الجـاك ده منـو مبـادى
انا ما غلبتنـى وغلبتـا معـاى أجـوادى
خليتنى أشكى لى خلقوا القريب والغـادى
وصيتك كتيـر وكتيـن دحيـن ماراضـى
اتعذب براك وانا تانى ليـك مـا فاضـى
انتا يا الضيع عميرك كلو حاصل فاضـى
فى دى عيون جميلـه وداك خديـدا نـادى
قبيل وكتين نصحتـك ولـى تابـا تلاقـى
انت ما عارف الظلم عند البنات شىء عادى

[احمد كسلا]

السحيبات

غناء المبدع / عبد الرحيم البركل




أبكن ياسحيبات ماكفاي بكيت
وأديكن روا .. وأنا بالدموع ما رويت
ترا الفيهم حنين يبكي ويبكي بكاي
وأحدين قالو يا ود بنعوف جنيت
كان جنيت كتير من جن ماني براي
دي المكتوبة لي وان بي قسمتي رضيت
من فارقت واديك قلت تميت حول ..
كيف يبقة العلى وأنا للسنين عديت
أنا صابر يا سحاب حولا وراهو الحول
وعارف يوم وقع فى حبو ما سميت
تراك وسط الدوع تضحك بريقك شال .
أما انا يا حليلى العمرى ما فريت
روح يا سحاب فلل عليك الليل
وبلغ لى السلام لى دارو ان مريت
كلمو بالحصل لو تانى لى يعود
وأوعة تعاتبو شان يزعل يقولك أبيت
وبعد الحول تعال غاشينى
برجاك فى محلى دة أنا بقيت حييت
وان بقة ما لقينى ابك على ونوح .
واعرف انى مت بى شوقو واتفكيت

[احمد كسلا]

اكتب ليك

أكتب ليك واطّول في كتاباتي
يفيض احساسي وأملأ الدنيا بكلمات خطاباتي
بجمع ليك لغات الدنيا .. واكتب ليك
وبي لغة العجم مرات .. وبالعربي الشديد وفصيح
وبي لغة الملائكة احيان .. والسرياني والتسبيح
وبي كل ذرة في ها الكون .. اكتبها ليك وأرسلها فوق جناح الريح
أكتب ليك في الأشجار
علي الأزهار
وفي الأنهار
محل ما تمشي قدامك .. تلاقي حروف رسالاتي
لأنك انت من ذاتي
يا ذاتي
ومهما كتبت ما بقدر أعبر ليك عن الجواي .. مهما طاوعت أقلامي كلماتي
وليه ما اكتب وانت الماضي بي احزانو .. بأفراحو .. والمستقبل الآتي
كتاباتك .. شويي خلاص
وانا الراجيكي تكتبي لي .. كم دفتر .. وكم كراس
ومنها داير أفصل جبي وأندروش .. كمان طاقيي فوق الراس
ومن كلماتها اسوي السبحي والبخرات .. وكم حجبات .. اداريبن عيون الناس
وكمان تقروقة في محراب هواك أجلس مع الجلاس
وأخلي الباقي اتغتابو .. لو بعدك غشاني نعاس
وانا الراجيك تكتبي لي .. كتاباتك تكون في الظلمة لي نبراس
انا العايش فراقك لي .. بشوفك في عيون الناس
وعاذرك لو كتبتي قليل .. رضيان بيهو مادام بي وفاء واخلاص
أريت يوما فرقني معاك .. يكون محذوف من التأريخ
وتبقى ايامنا سته ونبقى بيها قراب
أريت بلدا تحرمك مني .. لوما انت تبقى خراب
ويسكن في خرابها البوم .. ويصايح عليها غراب
وصاقعي تقع تدكها .. ما تفضل فيها ذرة تراب
وتولع فيها نار الله .. تصبح كوم رماد وهباب
تمرقي انتي .. والناس المعاك قراب
ما دعّيت خاتي .. الا الفراق اسباب
وأكتب ليك ...

[احمد كسلا]

كيفن اصبر قليبى

غناء المرحوم / يس عبد العظيم

كيفن أصـــبر قليـــبى ... وكيفـــــــــن أعمــل حسابى
ما دام عشمى فى نظــــــرة ... والعندو النظرة مابى
بجرو غنايا أحكى ليكم ... تعالو أسمعـوا يا صحابى
حكــــاية الشافعى البريدا.. وريدا شقــــايا وعذابى
أحن لها حن القمـــــارى .. تقوقيبـــــا أوتار ربابى
واهوى الهوى فى هواها .. وهواها قرايتى وكتابى
منو القال ليكـــــم عقلتَّ ... وحاتكــــــــم جنيت دابى
بقيت لمان ليها أفارق ... أفارق عقـــــــلى وصوابى
أضيق لمتين ليها أرجع ... أخاف مايطول بى غيابى
أعاين زين فيها وأشبع .. وأزيد إعجاب على إعجابى
أشرِّق وين ما أغــــــرِّب .. وأشيـــل همى وإكتئابى
محل ما أمشى ألاقــــى طيفاً.. مشتت فكرى وحجابى
تطير روحى بعيد تغــــــازل .. خدودك زهر الروابى
تتعلق بين عيونا ... ورموشـــــــــــا البى فوقا كابى
قليبى يفارق ضــــــــلوعى.. يلاهى عليها ويشابى
بعيد مابيقــــــــــــدر يقاوم ... بريق البسمة السحابى
صديرن لما يتفـــــرَّ.. تبــــــق نار الله فى أعصابى
وقديلتن كيتن على .. وا نشاف ريقى وخــــم ترابى
حنينى ومرات بتقسى .. تقول فى نفســــــها اتغابى
إتغابى العرفة فيهو.. وا زرف دمعــــى ووا خرابى
صحيح أصبحت مملوكا .. أســوِّى أورادى وأزنابى
متل ما ملكت فؤادى .. أنا ملك شيطــــــــان الكتابى
أخاف ما بقــــــدر أعاتب .. أقول تزعــل من عتابى
أموت أحسن من هى تزعل .. أو تزرف دمعة كابى
عشانا أنا كم ضُقْتَّ مُـــــــرَّة .. عشانا مهمِّل عقابى
عرفت الله فى عـــــذابك .. إنتَّ خاف الله فى شبابى

[احمد كسلا]

المن الله واصل

أبكـى إنتـى وأنــا اللإتبـكـى .. الـمـن الله واصــل
إيه فى إيدنا غير ما نبكى .. نحكـى البينـا حاصـل
تعذبـنـى وتهـيَّـج نــارى .. قـولـة مــاك مـواصـل
إنتى ما عارفة السبـب مـن أهلـك الباقيـن عـوازل
كاسو فراقنا وبس دايرنى .. أحيا غريـب وهامـل
وأنا أرحم لىْ فـراق الدنيـا .. مـن عينيهـو ساهـل
أريتن عرفو روحى بلاكـى روضـاً زهـرو زابـل
مــن تلـقـاك تفـرهـد تـانـى .. زى الصـابـا وابــل
تلاقـى الفرحـة فـى عينيكـى .. للأشـواق تـغـازل
فوق جدول أمل يتجـارى .. يـروى الريـد مشاتـل
تسـألـى بالبسيـمـة التـايـهـا .. كـيــف بالله عـامــل
أخاف حزنك وأخبى البى معاكى أضحك وأجامل
عمرى العشتو كلو وراكـى .. بـى أحزانـو حافـل
لـكـن الصـبـر يــا روحــى .. كــل الفيـهـا زايــل
زى ما إنتـى تسألـى عنِّـى .. عنِّـك برضـو سائـل
وصورتك عايشة فى وجدانـى طالـع وبيهـا نـازل
ألقاك فـى الصبَّـاح وإشراقـو .. فـى نغـم البلابـل
فـى كلمـات كتبتهـا ليكـى .. تــب مــا قــالا قـايـل
لو بقدر أسيبك وأمشـى مـا أصبـح جسمـى ناحـل
ولا بـاريـتَّ درب الـريـد .. ودرب الـريـدة قـاتـل
ولا شقَّتْ مراكب آمالـى .. بقيـدا أنـا لسـة واحـل
ولا أمسيتَّ أنادى دموعى .. والليل نجمـو راحـل
هـم دايريـن يفرقـو قليبـى .. شافـو عليكـى مـايـل
منـو الفيهـم يفـرق النسمـة .. مـن زهـر الخمـايـل
مهمـا أشقـى أضـوق المُـرَّة .. ولـلأهـوال أقـابـل
أبداً يا كتاب حبى المقدس عندى مابيقراكـا جاهـل

[احمد كسلا]

مناى شوفتـك كـل ساعـة

مناي كل لحظة أشوفك .. مناى شوفتـك كـل ساعـة
فراقك بكاهـو قلبـى .. وكتـل فـى نفسـى القناعـة
أطرى يومة ودعتـك الله .. وعيونـك باكـى دمَّاعـة
غلبنى أقلدك وأوادعـك .. حمتنـى عيـون الجماعـة
حسيت بى كبدى واقعى .. اتغـرس سكيـن وقطاعـة
وأنا أتيتم بى فراقـك .. يتـم شافعـاً فـى الرضاعـة
زمانى الصبق الأمانى ..غدرنى وفـات بـى سراعـا
مالو كان إتأخر شوى.. هـو عـارف الفرقـة لواعـة
داير أعاين أمتع عيونـى ..عيونـى وراك وا ضياعـا
دى ما آخر نظرة لى فـى الوجيـه الكاسيـة الوداعـة
كتير سرحت بى الوساوس همومى غرقـت فـى قاعـا
بقيت بين أقعـد وأسافـر .. شكـوك نفسـى واقتناعـا
إن قعدت الناس مابتريح .. وفراقـك مالـو إستطاعـة
غايتو قسمة وقسموها لينا آب تردهـا كـف الضراعـة
وحاتك مجبـور أفـارق .. فراقـاً مـو بـى قناعـة
وأبيع روحى أنا ليكى وأمشى ومنو القبلى أنا روحو باعا
مالكاها ومالكى ساسا .. السمع ليكـى إنـت والطاعـة
ربيعا أنتى وعز شبابا .. وحياتـا بـلاك شـن نفاعـا
قدر مـا تفـرِّحْ .. تبكـى .. حقيقـة الدنيـا خداعـة
تلمَّـك لامـن توالـف .. وتفرقـك فـى أى سـاعـة
تخبى أقدارا فى أياما .. وتلـف حولـك بـى براعـة
تجيب تديك مـن عذابـا .. وشقاهـا البعقـب متاعـا
وداعـاً ثمـرة فـؤادى .. ودعتـك أميـن الـوداعـة
وحاتـك مابنسـى كلمـة العصيـر شاقيـن الزراعـة
ولا بتحلالى غير سيرتك .. وكت نحكى أنا والرباعـة
إن هدولى الجنة بى حورا .. ألقى فيكى نفيستى طماعة

[احمد كسلا]

ماضي الزكري

ماعارفين حبال الذكري تنجـر فـوق قليبي سيوف
نرسمو خلا ما ضي الذكـري غدار في الغرام معـروف
***
ياخلا تعرفــو البيـا البي ما بتطـلو حـــــــــروف
ما لسـه وتـراي للي في سجـن الغرام مكتوف
***
الحال التوصفــو فيـه ظاهـر وللعيون مكشــوف
والله العظـيم كان تبكو لو شفتـو الدفين في الجوف
***
داجي علي ياخلايا اهيم البال علي مغـروف
ما جايب خبير للدنيا زي فاقد السمع والشوف
***
ناحل جسمي شاحب لوني زي زهرا ضبل ملفـوف
لكن الهمــوم والحسره زي الضاربي فوقي دفوف
***
ياخلا البريـده قليبي يوم لقياها ما معـروف
املتا وكتيـر راجيها خاب ظني ورجع مكـسوف
***
ماقادر اقـــول خلـتني او جارت عليها ظــروف
ولا قادر اطمن نفسي من فارق الظنـون والخوف
***
بقيت اشــتاق لليل اقول يمكن خيالا يطوف
يرجع لي صوابي افيـق يعـود قلبي القبيل مختوف
***
تمر سالت دقيش نسمات عبير طيـبا يفوح مسروف
يرد روحي ويبل شـوقي ويصيب جـرح الاسي المالوف
***
يعود الليل واعود لبكايا في ليلا طـويل مــــــــردوف
منداري من الجحيم يا خلا من فوج بالهموم مزفـوف
***
اسوق بين الدمـوع والحسره داير لصباحي اشوف
حليل شمسا تعيدو صباحي في دنيايا طـاقي كٍـسوف
***
قط ما كان غريب ياخـلا الحب لمصــــــايبو اشوف
من شدة هواي في دربو صار عندي العـذاب مالوف
***
يسعـدني اني صنتو هواها بادلتا العــــــذاب معروف
زي ما صان قليـبي هواها طوع في غناها حــــروف

[احمد كسلا]

العهد الوتيق






مابيبره الجرح تب لا لا مابيبره الجرح
غير ماتكون جنبى وقريّب منى يا زين ياسمح

شرقت وين غربتنى وخليتنى لى شوقاّ تلح
يمرق من النسيان طرا ويتمدّ فى الخاطر يلح
يرحل بى عبر الذكريات للماضى والزمن السمح
يوم كانت الايام لقاء ويوم فيها بى شوفتك فرح

ويوم فتّ ما خليت غير , كلمة وداع وقلباّ يوح
خايف فراقك من يطول والحال وراك ما ينصلح
وضياع أمانى رهاب رهاب تترجى فى حظاّ يشح
دفتر وغنيوات تمدحك وعاجزات حروف عن المدح

أما انت لو سائل على يغنيك حالى عن الشرح
حال الفراق بعد الولف لى زول يعرف الريده صح
لبستنى العهد الوتيق , وخليتنى فوق نار منطرح
ليلى ونهارى علىّ ليل كيف انت امسيت وصبح

لى حق اجاهر بى هواك وكتين يشيلنى ويتكسح
واضرب بلاد الله طشيش لى بسمه من وجهاّ مرح
عطشان حنينك ماب يفيق وماب يروى رحراحاّ يرح
والعاش مع طيفك زمن , ماب ينجا فكرو من السّرح

ليك حق تعظمك المهج وتبنيلك الأعماق صرح
وليك حق نشيلك فىالعيون بالرغم من نزف الجرح
يا هاله بين الفرقدين نورك على الآفاق وضح
ان شافك العاقل يجن , والجنّ بى شوفتك نصح


روّح ودعتك لله عاد , يا اب ذكرةّ ماب تتمسح
منحوته فى الايام خلود , لاتغيب ولا من بال تزح
وليك شوقى وآلاف السلام يبراك فى الحل والنزح
وأعرف فراقك ماب يهون , وأعرفنى من بعدك قمح

[احمد كسلا]

كاتب القدر

أكتبني يا كاتب القدر أكتبني والمحفوظ شهود
أكتبني إني عشقتها قبال نري النور والوجود
***
قبل الزمان وقبل المكان في عالم الغيب والجمود
روحين علي الريد إلتقن قبال يكون للريد وجود
نزعنو من رحم العدم ختنو في مهد الخلود
من عهد (ألست بربكم) يوم خرت الأرواح سجود
***
في رحلة المجهول سرن عبرن مساحات الزمان
عاشن علي الود وأخلصن في كون ملون بالحنان
سبحان من وهب الجمال من قال للحب كن فكان
خلّ الفراش في العاشقين يهوي الآزاهر والورود
***
أول صباح صحي الوجود ولبست دنانا النور وشاح
كنا وتالتنا الهوي نتقاسم اللهو المباح
لا شافت العينين دموع أبدا ولا أتخلق النواح
غير بسمة راكه علي الشفاه دافعاها ريده بلا حدود
***
جرت المقاير بالفراق .. اروح بلاد وتروح بلاد
ويمضن سنين يتعاقبن وتصبح دهور من غير عداد
أنا في رجاها هي في رجاي نتلاقا تاني علي الوداد
مهما الزمن يمتد بين .. لابد يوم بالليم يجود
***
أحلي الصدف من غير ميعاد يتقابل الخل والخليل
في الدنيا أو غيرها طالما الليقه هي الحلم الجميل
لولا الأمل ما عاشوا ناس في الدنيا بالحظ القليل
ويافاقد الأمل العريض مين قالك المضي لا يعود

[احمد كسلا]

كلمة احبك




كلمـة أحبـك مابتكفــي ويـن منـزلــة الحــب مــنذاتــك
والبستاهل طيـبــة قلبــك مامـخلــوق أبـدا وحياتــك


انــتي قلـيـب الام لـي اطفــالا مـن شر فـوقـم يـرشـح حنــو
وانـت صبـاح العيــد فــي اشـراقـووفرحـه شفعنــا الراجنــو
وانـت غنيــوة الشــوق الراحـل للعشــاق الفيهــا يغنــو
يغسل حزن الدنيا الفينا وبردن نتحد من بسماتك


متـل العافيـة دخلـت مسامــي شويـه شويــه وقـف لا حيـلـي
كـل الزمــن الفـات متغيبـب دابــي فـرزت نهـاري وليـلـي
فـي عينـيــك صالحـت الدنـيـا اتصافيــنا وقلت عديلـي
مـالا الليلـه ادتنـي قفاهـا وحسـدت تانـي علــي كلماتــك


ياالشكلتي حياتــي فـي لوحــة بي الوان بمستقبــل رائـع
فيهـا ظــلال وتلاقـي خطوطــا ويبـدا ربــوع العمرالضائع
يرحل برج النحس ويظهر برج الريده وسعد الطالع
وغبتي وغـابت اجمل صورة قبل ماتختــي اخـر لمساتك


انا لا زال بتخيل رسمـك وصورتك ماليا مساحة فكري
انشـد فــي خطــوات الماضـي وزمن اللقياى البشـرح صـدري
سـدي الفجــوة البينــي وبينـك صـدق وفـاي والحــب العـذري
احلـي ايــام العمــر زمانـك واحلـي زمــان اللقيــا اوكاتــك


ماكان فــي الحسبــان نتفــارق ياهـا اقدارنـا وحال الدنيـا
ايــد القسمــة ان وقعـت صابـت مابتشفـع فـي ردهـا منيــه
الا الحلـم البيك كـان اكبـر مـن احسـاس وصــف فـي غنيــه
والغرقـان فـي الـريـش يتعلـق وريشتـك تبقـي فضـاء كلماتـي


امشـي وخلـي الذكـري التـرزح مابين صمتي وحـدة شوقـي
اواتقابلــي وابقــي دواخــــل وارشحي رشــح الـدم فـي عـروقــي
ذيحي ليلي وابقي صباحي زيحــي ظلام الهم من فـوقــي
فــي كل الاحـوال برجـاكـي وبتـرجـاكـي ورجـاي مافـاتـــك

[احمد كسلا]

الشوق والحنين


الشوق والحنين فاض بيّ .. الليله وين يابنيه
مشتولة الجروف النيه .. خضرا وفي غصينها نديه
حام غفرك حمانا الجيه .. الليل والنهار دوريه
***
سمحه وبالعفاف مكسيه .. قمره ومافي ليكي إخيه
فوق الجيل عليتي ثريا .. وين تاجوج وعازه وريا
***
شلتي عقولنا ليه ياظبيه .. سارحابا الهويد والصيه
عطفك بي قلوبنا شويه .. والكبد البقت مشويه
***
نارك في فؤادي أنا حيه .. ما بتطفيها آه و أحيّ
شوفتك حسنه تمحا السيه .. مالو إن جدت بيها عليّ
***
محتار والله عالم البيّ .. جافيها المنام عينيّ
قسمه وقصرت إيديّ .. وآجت نار غرامك فيّ
***
ليكي سلامي وألف تحيه .. تتعاقب صباح وعشيه
تغشي البيّ الجمال محريه .. ملكه وبت ملوك جعليه

[احمد كسلا]

التحــدي 3

مجالس شعرانا ضجت محيرها نومك وصحاكي
وبنات أفكارن تحلق تتوه بين أرضكوسماكي

مدلّله يابت زمانك سبقتي القبلك ووراكي
مثل هارون الخليفه وكت يتباروا شعراكي
يشدوا عواتي القصايد وسنان أقلامن تحاكي
عيونك وكتين توقل وتحين لي ضرري وهلاكي

غريبة إنو يخلّوا زولن وغصب ينحازوا تالاكي
ويظلموا الظالماه ديمي ويكوسوا عفوك ورضاكي
مع إنك ياكي الجنيتي ومع إني أنا يا الجيت شاكي
ومحاضر ريدك بتشهد بدايتك وبعد إنتهاكي

أريت لو كانت حروفن تغير ميزان هواكي
وتقلل حالي العليّ وتزيد صبري علي جفاكي
إذا نمتي علي الخواطر وشغلتي أفكارن معاكي
وكت تصحي علي غرورك منو البدنيك من علاكي

مخيره ده الفي مرادك عناد إخلاصك ووفاكي
ومسيّره كيفن تمرقي من الكون الإحتواكي
جاهدي قدر ما تجاهدي معاي ما بتبعدخطاكي
ولا بيساعدك نفوذك وإرادتي تحتم لقاكي

جبرني هواك ما جبرتك وأعوذ بالله من هواكي
وجحيمو الواقودو صدك ونفورك وشدة قساكي
إذا ما إنسانك محنه ورجيت شن فايدة رجاكي
وإذا ما المحبوب تنكر علام علام التباكي

[احمد كسلا]

التحــدي (1)

نومي غريرة في خدرك إذا ما ضماك ليل
وخليني أنا للدرادر وسهاد الليل الطويل
***
معاك قبلان التحدي وبسوم ليه الروح عديل
وأشوف لا وين لي يودي عنادك والمستحيل
أعصفي شوق لا تهدي اليخم فوق رأسي ويكيل
أنسي أو أتناسي ودي وميلي خلاف ما أميل
***
هيا أدعي زبانية عذابك إذا شايفي البي قليل
وإذا ويلك عندي جنة أكيد بعشق كل ويل
سوي سواة قوم آذر ووقود ناري للخليل
ونارك برداً وسلاماً علي قلباً بيك عليل
***
أدفري قواسيك علي مجرق وليهن بشيل
وحتي الضالات طريقن علي أبقالن دليل
يسوّن زي ما يسون شنو الأكتر من قبيل ؟
وشنو الفضل مني يرغب صباح الفرح الجميل
***
جفاك هجيراً يحرق وأكوس في ضلك ضليل
وضل الدوم يرمي غادي ويحرم التحتو المقيل
سوابق همك ولواحقو أفوت من ديل ألقي ديل
وأقع بيناتن ممنع وألم باقي الصبر حيل
***
متلما الله حباكي نواعس وطرفاً كحيل
وسيوف تبرق بين لواحظ تكاد تسمعك الصليل
حباني مواضي القوافي وشياطين أشعاري خيل
أجاجيبا أمثال عيونك وأتشرف أموت قتيل
***
عشان لا يسعد بلاهن ولا غيرن لي سبيل
ولا بقدر أفوت حجاهن ولا بيحلالي الرحيل
خصامك وشدة قساوتك أخير من عطف البديل
ويقل عطفك ولا يكتر يقابلو الشكر الجزيل

[احمد كسلا]

الزوله الشالت قلبى عليها





يا الجايين ما شفتوا الزوله الزوله الشالت قلبى عليها
ما أدتكم لىّ رساله تمحا هواجس الحاله الفيها

ما وصتكم وقالت ليكم انها ماب تتأخر تانى
وما قالت خلتنى وراها عاصر جمر الشوق واعانى
ولما حكت ما سالت دمعه بلّت دير توبا التحتانى
وما اندارت فى بسمه عساها تخفى الحزن الفى عينيها

دى الانسانه الطيبه الوافيه الردتها قبل ألقاها واريده
كانت حلمى وظلت خاطره وحبها صار ايمان وعقيده
سارت مسرى الروح فى ذاتى وعاشت فى افكارى قصيده
تحكى أمانى القلب العاشق وصدق احلامو المستنيها

طول الغيبه الشعوت شوقى والايام بيناتنا اتمدّن
كم مدّيت لى صبرى حبالو الاّ انقطعن حين ما انشدّن
نيتى ’ أرج ’ فد ليله اطوفا والقى سعادة الحجّ ومدّن
الاّ الله ما قالها كونى وتانى غريب وما عارف الجيها

شلت صدى الايام الخاليه وعايش بين الفرقه وناره
بعدها ما بدلت هواها .. رغم هوى النفس الاماره
وما حسيت بالدنيا جميله الاّ خلال بسمة ازهاره
وما استلطفت الزهر واريجو .. الاّ لأنو الزهر سميها

عابوا علىّ اهواها ولاموا وشككوا فى الاحساس النّابع
مالى ان كان غنّيتا غنيوه او فجّرت اشعارى منابع
اتماسك قدّامن واضحك وقابض نزف الجرح الرّابع
وروحى معلعله فى علاتا وقولوا معاى الله يشفيها

[احمد كسلا]

فواتح الامانى



دروب ليك يودن اسيرن بطوعى

اواتيك حنيناً يجيش بين ضلوعى

لانك بدايتى ونهاية شروعى

من نار غرامك اولع شموعى

واشيل من بسيمتك مناديل دموعى

أقابل عيونك كتير يهدئ روعى

واشوف فى وداعك بشارة روجوعى

عيونك فواتح الامانى السعيدة

تنوم فى ظلالن مداين بعيدة

رؤاهن مداخل عوالم جديدة

تفتر وصوفن حروف القصيدة

يطل من نواضرك صباح البوادى

وسط ليل مشبع مسادر حوادى

آيا كرنفال فرحة رايح وغادى

يجول بين قلوب البواكى الصواغى

عشقتك نسيم همبريب الشواطئ

ضليلاً يبرد هجاير حياتى

تاخر زمانك سبقتى اللواتى

مناى وبقيتي اعز امنياتى

احبك لانك بقيتى الحقيقة

تفاصيل حياتى وخواصى الدقيقة

رسمتك معالم دناى الوريقة

تسابق خطايا واصادف طريقه

منى التبقى زيك حنينة السجيه

وتكون الحبيبة الصديقة الوفية

ام للمشاعر وللروح اخية

بلاك يا سعادة النفوس الشقية

[احمد كسلا]

اوآخر الليل

غنيتك اواخر الليل غنوات والعالم مابين غافي وحاس
ياغايبة وحاضره ووكتيه ياطالعه ونازله مع الأنفاس
***
غنيتك فرح أكبر من كون اشكال الوان افاق وابعاد
غنيتك حزناً شالو الهم كحل عينين من غير مرواد
غنيت لقاك شعوتني الشوق لا ضقت غميد لا شفت رقاد
لامن حننتا القافيه دموع عطرتبا صورتك والكراس
***
غنيت طانشت هواجس الليل لكن الليل طانشني وطال
شتان ما بين ليل زول موجوع وليل زول رافل في الزين والفال
أقصر أو طول يا ليل تنزاح لابد من صبحا يرفي الحال
ماك أصعب من يوماً في العيد شهاني الفرح الشالو الناس
***
معليش لو مره اتزاعلنا أو حتي حصل بيناتنا خصام
دا ما معناه إنك تقسي وترميها اللايمه علي الأقسام
انتي البرضاك اوهتي الريد وفي حق الريد والله حرام
معقول الببني الريده سنين يرجع في غفله يهد الساس ؟
***
أنا ما ياني الخضرت الحن حاحيت من فوقو جفاك وجفاي
عشعشتك في الخاطر ذكري وما كان الخاطر ليك نساي
لا انتي بتشبهك القسوة لا كت بتخيل تبقي جزائ
اتخيلي حال زولاً عاشق معشوقو إرتد عن الأخلاص !!
***
كيف تبقي تحب لو ما عانيت وما شلت الحب آلام وجراح ؟
والحب لو ما ودّر بالزول ما بكون في نظري الحب الصاح
والقلب البات بالحب مهموم احسن من قلباً نام مرتاح
وأنا عندي سماحة الريد في اتنين آنات الليل والطرف الحاس

[احمد كسلا]

مدهــــشة
الشوق غلاب .. والوعد سراب
في بعدك يا أغلي أماني
ياسحر الروعة الاسطورة
وآحشاني عيونك وآحشاني ؟
***
يانسمة صباحية إنسرقت تتخلل مد صيف أحزاني
في ارحب واحة ريد انزل فوق ارضها واكتب عنواني
يا الله عليك وانتى بعيدة ويا الله ملامسك وجدانى
اقراكى كتاب تملينى اعجاب وتجددي آمال من تاني
***
مدهشة يا شمساً تشرق علي قامه وابداع رباني
لا تثيري عواقب الريد جواي لا تصحي همومي واشجاني
وأنا بين الحاضر والماضي لا زال بتعذب إنساني
ضميني إياب نسيني عذاب خلي الأفراح تتلقاني
***
أنا جيتك من واقع مذري وعالم مليتو وملاني
لا تسألي عن كنه حياتي أنا جسداً وروحاً غلباني
أرسم للناس الكون بهجة طرباني وما بينهم أعاني
ما رمت خطاب الا واجاب أنا شاعر لو صح بياني
***
تاتيت الريد لامن درفن وخايفلو من الزمن الجاني
شيليه علي صدرك رأفة وختيه علي حنك تاني
حجيه حجا فاطني السمحي والفارس الدوباها أغاني
وياما الأحباب يوم يبقو قراب الدنيا تزغرد نشواني
***
يا شامخي علي كل الدنيا يا وحي الشعر الإنساني
جد روحي تفتش لي روحك وما كان لقياك في حسباني
ما فاكرك من صبري تمرقي وتختالي علي أوتار ألحاني
والأمل الغاب طول ما جاب الليلي ألقاه وبيلقاني .

[احمد كسلا]

يا بت من الماضي

كيف اوصلك ؟! وكيف أقدر .. أنساكي وهواك ما بنترك ؟!
أحترت فيك وأحترت في .. القلب اليفكو وينشبك
***
يابت من الماضي ومأججه .. ذكريات .. تعجن تلك
في حترب البال الموقع من .. جدار عقلاً مقرب يتسهك
مالك علي .. راماني بين ؟! .. أخطا وأصيب آمن وأشك
وأنا لا كفر يوم بي هواكي .. ولا دخل قلبي الشرك
***
وين إنتي من طول الرجا .. وحبل الهوا الما بيتمسك
وصبراً ألتق وبالصبر .. من تاني يرهف ويتهتك
دليني غاب محراك علي .. وأبت المسالك تنسلك
وين في محطات الزمان .. أصباك وعارض الشوم يفك
***
اسأل عليك رجع الغنا .. المنضوم علي حنّ السلك
والشوق يسرسف فوق .. نسيمةً راحلي جوف ليلاً حلك
كان تلقي عندك صيبه لي زول .. يداري دموعه بي توب الضحك
ومرات يفتش للبكا .. وما يلقي دمعه عشان يبك
***
لا تتكليني علي الحظوظ .. ما لي حظاً يندرك
والناس حظوظها تغيب تجيب .. وانا حظي في اللا شئ يسك
أحلامي ما بين الغيوب .. فرت طيوفها أبت ترك
وأحزاني تتعاقب فصول .. حابكاهن الأقدار حبك
***
أديتك البقدر عليه .. الطالباه والغير مطلبك
والقلب ما ملكت يداي .. طوّعتو ليك وأصبح ملك
وما باقي شرطاً في العقاب .. يرضيك ويرضي تصورك
غير روح خجوله من المروق ..منضاري في جسداً هلك

[احمد كسلا]

يانسايم

الشاعر ابراهيم ابنعوف

فسراع يانسايم أشواقـي ودن لـي السـلام مطبـوق
لاهلنا وجميع حبانـا فـي الحلـة التحـت والفـوق
****
هبي علي الشمال تلقيه ده المال فـوق جريـده يتـوق
يتراقص مـع نغمـات قماريـه .. التسـوي القـوق
بي طيبة الحنان يلقـاك يهـش ليـك ويطـول لفـوق
ويكتر في السلام يقلد مثـل عاشقـا لـي المعشـوق
****
هناك ساقةً محاضنة النيل تدفق فـي دمـوع الشـوق
تتبكي وتبكي الـزول وكـت نـص الليالـي تسـوق
باري جديولها اطلعي فوق وشوفي دحين شنو المسيوق
وبعدين بي بشيشـك لفـي قدّامـك شتيـل مكـروق
***
داك حالي الرحل مندلي جايـب للخضـار مـاروق
وداك بدر يحش في قشيشو عجلان باقي لاحق السوق
وداك قراع مقرن مويتو فتـران دار شـوي يـروق
عشان يفتل حبيل يربطبـو قادوسـا نعـس مطلـوق
ديل اهلي الحنان يانسمـة اهديهـم سلامـي وشـوق
طول داير ازورهـم مـرة الا قديمـي ..مامطلـوق
وان سالوكي عن احوالي البـي مايصيـب مخلـوق
تاهـت بـي مراكـب الغربـة لاريـس ولاواسـوق
****
والدرب المسافر بيه فـي طولـه بتهابـه النـوق !!
خمس سنين قعد في ظلامه ما بان لي صباحه شروق
اساهر الليل مـع الباكنـوا يتجـاري الدمـع سبلـوق
وابكي علي الزمان الفات وما اظن البفـوت ملحـوق
***
انسلب اللحم من جسمي واصبح طب عضام وعـروق
واما قليبـي لوشافـوه بـي نـار الغـرام مشقـوق
لا لاقي اليحـن فـي حالـي او زولا علـي شفـوق
وان بقي عاد دي حالتي البي ما اظن للسعادة اضـوق

[احمد كسلا]

لا تسافري


تسافري !؟ أوعك ما تسافري
بلاكي الأيام .. كئيبة
أملنا وغاية منانا وجرحنا الليهو إنتي طيبه
***
تسافري بخاف يوم وداعك وأخاف اللحظة الرهيبة
وأخاف تفضحني عيني دموعها تكتر صبيبه
وأخاف كلمات بيها أصارحك تخوني ويقسي ترتيبه
وأخاف روحي قبل توادعك تروح ما أقدر أجيبه
***
بوادعك لو كنت بقدر قليبي عيونك يسيبه
تجرح وحد ما تجرح يريدها وبقي مبتليبه
يحنلا ـ بي شوقها يرزم رزيم اللتمد قضيبه
وتجهجه فيه الليالي وبعيد للتوبه والنيبه
***
بيرضيك إنك تسافري وتخلي وراك في مصيبه
أحاولو أكلم وأوصي ووصيتي يفارق دريبه
يصر من شدة حماقتو يتابع أفكارو الغريبه
حماقة البقلع هدومه ويقع في النار يصطليبه
***
تسافري أنا وين ألقي زيك سماحة وأخلاق عجيبه
يا الجمعتي عيون النوافر ورشاقة النسفت سبيبه
خدودك آه من خدودك أصيل المايلي للغيبه
ونسيمك حين في يسري بلا الضارباه وتيبه
***
إنتي سفرك يحزن بلدنا لأنك ليها الطبيبه
ولأنك شايلي حن ناسها وقليبك ما خلا طيبه
وتاني لا يومين لا تلاتي دي سفره وراها طول غيبه
تبقي كيف لليوم ما يشوفك عليه تضيق الرحيبه
***
كدي أخري سفرك شويه وتعالي أبقي لي قريبه
وكمان لو هان خاطري عندك أرضي خاطر الوالده الحبيبه
مناي تمسيني وتصابحي وأكون جنبك لا مغيبه
وأشد قلبي وتر ربابه وحروف أسمك أغنيبه
***
أنت كم زيك زهرة يانعة إرتوت في أرضنا الخصيبه
من نقرب ننسم شذاها المدن تقطفها تنتشيبه
وكتير فينا من المجرح قليبه ومجروح قليبه
وفي النهاية قدرنا إنو نزرع حصادنا الندمه والخيبه

[احمد كسلا]

ست العيون




هــــل تـــــدرى يــاســـت الـعــيــون ال الله هـــــدّلا بـالـنـعــاس ؟؟
بــى لطـفـو لــو كــان ماسـتـر يــا مــا هـــى كـــان تـــاذالا نـــاس

عيـنـيـك .. فـتـنــة فـاتـنــه .. واتـخـلـقـت عــلــى هــــذا الاســــاس
دخـلــت دواخـــل العالـمـيـن .. وكــانــت بـعـيــده عــــن الـمـســاس
الـشــى المحـيّـرنـى انـهــن , لا هـــن لآلـــى ولا هـــى مــــاس !!
يتبالجـن . مويـة صفاهـن ترشـح الضـو فــوق مسـاحـات التـمـاس
اتــوســط الـلـيــل الـصـبــاح فـيـهــن , ومــــع الـغـرويــده جـــــاس
ورمــت الـرمـوش فـوقـن ظــلال , يــا روعــة الـرمـش الـمــواس
حـيــن يـنــزل الــفــوق لـلـتـحـت .. وتــبــدا المـطـابـقـه والـجـنــاس
وتتـكـامـل الـلـوحـه الخيـالـيـه , الـخـرافـيـه , الـمـحــدده بـالـمـقـاس
تملانـى حــن .. اغـبـا واجــن .. ومــا ألـقـى مــن قـيـدن خــلاص

كـانـت عيـونـك طلسـمـات الرهـبـه فــى العـهـد السليـمـانـى الـفـديـم
طـافــت شـمــوس الـحـسـن فــــى أرجــاهــا , والـسـحــر الـعـظـيـم
جلـسـت عـلـى عـــرش الـجـمـال .. وســـادت عـلــى كـــل الأديـــم
أمرت جنون العشق ان يأتوها بالقلب البيعصى الريده فبها ولايهيم
مــــا ارتــــدّ طـرفـهــا الاّ كـــــان .. الـقــلــب والــجـــرح الألــيـــم
بـيــن سـطــوة الـمـلــك الـرهـيـبـه .. وخـيـفــة أصــحــاب الـرقـيــم
يــا ويـلـو , مــن لحـظـاّ يطوفـبـو .. مــن الجحـيـم , الــى الجحـيـم
وتـفـتـكـبـو نــظـــرات الــتــواعــس , فــتــكــة الـــنـــار بـالـهـشـيــم
مـــع انـهــن .. لليـعـرفـن .. أضـعــف خـلايـقـو , واشــــدّ بــــاس

عيـنـيـك عـوالــم مـدهـشـات , عـيـنـيـك ولا كــــل الـعـيــون
عــلــويـــه , أو سـفــلــيــه , أو كـــــــان داك دون الـــدونــــو دون
أخـــدت مـــن أســــرار الـفـلــك .. مــــا لا تــعــج بــيــه الـمـتــون
كــــل الـشــواهــد , والـظــواهــر , وحـكــمــة الــطـــب والـفــنــون
كـانــت فـــرح زمـنــاّ صـعــب .. مــــا عــرّجــت بــيــه الــقــرون
ودعــــوات تـبـاشـيـر الـصـبــاح .. فــــى خـشــعــة الأم الـحــنــون
وحـصـد الـرجـا المـمـدود عـلــى طـــول السـنـيـن خـلــف الـظـنـون
أو قـولـى زى خـاتـم المـنـى .. الغمـسـوهـو فـــى بـحــر الـسـكـون
عيـنـيـك .. صـحـايـف أرتـــلا .. واقـراهــا بـــى كـــل الــحــواس

[احمد كسلا]

حقو انت تحس براكا

البحبك مابيقوليك حقو انت تحس براكا
الله يعلم ياحبيبى روحي تشتاق لى لقاكا
يبقى ما عارف الحقيقة وقلبى كيف عايش هواكا
وماكا عارف فى غيابك حالتو كيف تصبح بلاكا
يبتسم يضحك يقابلك ويبكى بالدمعات وراكا
ويقرا فى عينيك سعادتو وسر ودار روحو وهلاكا
***
كلما أشرق ... صباحو تلقى لمّ اشواقو جاكا
وانتظر فى لهفة يسأل فوق دريب البص رجاكا
دار يقولك كيف صباحك ياحبيبو وطاب مساكا
وخوفو ما يقدر يقابلك ويبقى شال اللوم معاكا
***
لما جيت ليه مارجيتو ورحت فايت بى هناكا
ولاّ إتغيرت انت وحزروكا وما براكا
ولاّ شوقك ليه جابك إلابس خفت المعاكا
جيت شان تشرح ظروفك عارضك خجلك حماكا
***
لو صحيح قاعد تريدو متلو كان الشوق براكا
وكت ما بتقدر تفارقو ذى ماهو دار يوت يراكا
ممتثل خاضع يقولك ياحبيب داير رضاكا
ليه نسيتو ورحت نايم عارفو وا سهرو ان طراكا
***
تانى بعدك وين يقبّل ما بطيبلو العيش سواكا
ما بطيق .. يحمل فراقك وما يطيق يقدر قساكا
طرفو ساهد ربه شاهد حالو بالمر ما غباكا
ولِسّ جارى وراء حقيقتك ما استراح من يومو داكا
***
ما امتحنتو وشفت صبرو ماخلاص جرّب كفاكا
أوعى شيشك بى بشيشك ماكا عارفو جريح تراكا
لا تعذّبو .. ماهو مذنب أرحمو وخفف عساكا
ولو قسيت أو كان نسيت هوّ لا زال فى رجاكا

[احمد كسلا]

تعالو نبارك العيد

العيد جانا باليـــوم السمــح وزيـــــــن
يلاّ وزعوا للتهانى على المهاجـــرين
وللفــات اتغتــــرب والهسّ قاعــــدين
وللمشاشين فاتوا لى بيت الله حاجـين
ولـــى أم العيـــال وســـط البطينــــين
وللعرس بعــــــد جمـــــع المـــــلايين
لى شتولنا ولى خدارنا وللمزارعيــن
يجينا الجايى نحضر ونبقــى طيبــين
المعـرّس ينبســــط يلدولـــو تومــــين
والعزب يملاها حنّـه وياخـــد اتنيــن
شيلوا الفاتحـه يـــلاّ وقولـــــوا آميــن

[احمد كسلا]

استعجلى فى الجيّه

تعالى ياحلمى الجميل ألفينى فى الزمن الصعب
ألفينى وامسحى للدموع ألفينى انسينى التعب
ليه من زمان ما بنتى .. ولاّ دا ما اتكتب
أنا شاعراّ يهوى الجمال لكن لقاك هو الآحب
أهديك حروف ما انسطرت , أهديك شعراّ ما اتكتب
شعرى الحزين فرح قلوب العاشقين
ويظل صداهو مدى السنين
أفريهو زين أقريهو زين
بعدين بتعرفى انو من غلبى اتكتب
استعجلى فى الجبّه .. وسافر واستعجلى فى الجيّه
يالسفرك مابيرضى الخاطر , للعاشك جوّاهو قضيه
ما لمتك فى انو تسافرى لكن محتار قولى لىّ
فى بعدك كبف يصبر قلباّ يتحتّ عليك بالحنيه
ما انت براك عارفى الحاصل والزيّك مابدورلو وصيه
والزول ما بيرضى يفوت زولو لو كان ما القسم المقضيه
نان نحن متين اتلمينا .. لمن نتفارف يابنيه
ما الشوق القادك ودّاك ياهو الهسع موقد فىّ
مشتاقلك , ومشتاق لى بلدك , وللدار الضمت حوريه
يا أريتنى أغمد والفاها قبّال ما أفتّح عينىّ
يا حليلك , وياحليل أيامك ويا حليل أحلامنا الورديه
يوم عشنا الحب عالم آخر .. ما طافت روح بيه شقيه
طل صبحو يهتّف من اسمك ومن لونك زان العصريه
فى البسمه الرسمت فوق وجهك بسمة رقه وطيبة نيه
آه , ياللى هواك مابندارا .. وما بتخمد نيرانو الحيّه
قرّبتك شان انسى الماضى , الاّ الايام ما لا علىّ
ليه حظى مقبّل لى غادى وممحوق بى جاى صبرى شويه
ما الحب ياهو الحب الواحد , ليه بسعد ناس وناس مشقيه
باكر تتبدل أيامنا , وتصدق آحلامنا المرجيه
وبنعود من تانى ونتقادم فى رحلئة ريدنا الأبديه
ودّعتك الله وراجيكى .. طول عمرى ان كان فيه بقيّه
يبراكى سلامى واشواقى وليك احساسى ونبضى تحيه
ماشعّت فينا شمس باكر , ورمّت دمعاتا الفضيه
وصحّت فى خمايل الدنيا فراش يلثم بالشوق زهره نديّه
وما ميّل نخل الحى يرقص مع نسمه وقوقاى قمريه
برداّ , وسلاماّ , تغشاكى وتتواتر فى لحظه هنيه

[احمد كسلا]

المتلاشي

أحكي ليكم قصة غريبــه .. قصــــة زول شـــال غلبـــــو وراح
أول مـــره تشكـــك فيــــها .. وتتخيـــــلا تبقــــــالك صـــــــاح
***
من شافــع ما فــك الأول .. وكــل سنينـــو قضـــــاها نجـــــاح
لامــن دخـــل الجامعــة تفــوق .. قامـــت وقعــدت لو الأفــراح
كان في طموحــو مهندس بــارع .. ولا يكــون دكتــور جــراح
خمسة سنين للجامعــة يساسق .. لا عطــلات لا يــوم أرتـــاح
***
وإتخرج .. ساعة ما أتخرج .. فكـر يمشي يكوس لو وظيفـــة
فوقو ديـون من أمو وأبــوه .. يســددا قال من مهنــة شريفـــة
ياكل ويشـرب .. حامـد شاكـر .. حتـي إن ما فضــلت تعريفـــة
وأوضة الطين وضل الراكوبة .. عندو أخيــر من قصـر البــاح
***
خمسة سنين صاحبـنا بيجــري .. وكل الــدور تقفـــل أبوابـــه
شان لا عنــدو وسيط يمشيلــــو .. لا بالفيهــن عنــدو قرابـــة
خمسه سنيــن وشغيلـــةّ واهيــــه .. لا يفطــــر لا يتغـــدابــــه
خمسة سنين راحت من عمـرو .. ويبقي معاهــا كتيــر الـــراح
***
فوق الخامسي ردف للساتـــي .. همــو أكشــاك ومحلات شــاي
يبقي يصادفــو إعلان في جريــدة .. ولا من الجالسيــن الـــرأي
قعدتو قعـــدة زول مشلهت .. وفكـــرو يدولــق غـــادي وجـــاي
فعـلاً صــادف شركــة بتعلــن .. عن أشغـــال ورواتــب صـــاح
***
قـّرب يصــرخ من الفرحــة .. لامــن خشمــو أخدلــو رعيشـــه
هز جيوبـو عشــان يشريــها .. تانــي اتراجــــع عـــن فتيشـــه
أتذكر في أسبــوع كان قوتــو .. دردوم دكــوة ونــص العيشـــة
في الآخـر أكتفــي بي نظــرة .. وروح قابـــض غلبـــو الشـــاح
***
ما نــام لامــن باكـــر بــدر .. وزادو معـــــاه الخــــرم الجــــوع
سجلوا إسمو وشافوا أوراقو .. ووعــدوا يجيهــم بعــد أسبــوع
وراح يحلم بأنو أتعيــن .. ورقــو مديــر فـــوق عشــرة فـــروع
وفجـأة أستيقــظ صنقــع دنقـــر .. وقـــال يـــازول ربـــك فتــاح
***
بعد أسبوع .. وراجع للشركة .. ناقش نفســـو في أمــر غريــب
ليه سيـــد الدكــان ما رد .. (صباح الخير) مــع إنــو قريـــب ؟!
وليه كمساري الحافلة اتعدي .. وما طقطقــلو وقالــو تجيــب ؟!
وليه لمن واقـف يتسرح .. صورتــو أمامــو بقـــت رحـــراح ؟!
***
غايتو أتناسي وقدم ورقــــو .. والمسئـــول سامــع وما شايـــف
غير أوراق من مافــــي اتمــدت .. واستقبــلا استقبــال خايــــف
وراح مفزوع يسأل في نفسو .. (حتي الجان ما لاقي وظايف)؟!
باكر بمشي وأخلي الشركة .. طالمـــا الشــركة أتملـــت أشبــاح
***
رد عليهو الصـــوت من تانــي .. أرجـــع ولا تســئ التفكيــــــر
أنــا إنســــان عايـــش بينـــاتكـــم .. إلا اتــلاشيــت بالــدرديـــر
وما دام ما لي قسمه معاكم .. هاتـــو أوراقــي وشوفـــو الغــــير
وظل الزول ظاهرة كونية .. وما معـروف للنــاس ويـــن راح !!

[احمد كسلا]

الملامه

تغيرت أنا أتغــير ؟! محتـال ياروحــي أنا اتغــير
وحاتـك إنـي لا حبيــت ولايـــوم فـي ســواك فكـر
***
خطاباتك تعاتبنـي وأتــوه فــي سطــورها إتحسـر
علي الأمل البنيتو عليـك وعمري الخايفــو يــودر
وأكتب ليـك عشــان أرضيــك أقــل لومي وأتعــذر
وألوم في قلبي ليه ينساك وعارفو قليبي ما بيقدر
***
كيفن هان علي أنساك وأنسي العشـــره وإتنكـــتر
وكيف يجفـاك قليبــاً لـي بعـد فـي حبــك إتوكــر؟
أصبح كل منـاي ألقاك أفرح وخاطـري بيـك ينسـر
ودرباً في العمر سرناه نحـن ويــاك نفرشــو زهر
***
أريت ليلاً يشيلنـي معاك لــي بلـــداً بعيـــده ســفر
بلـــداً لافـــي زول طلاهـــا لا زولاً يجيبلـــو خبــر
ووكت الليــل يعــمّ الكــون وفــوق لربــاه يتحــكر
يسدل من ضفايرو السود وإتوسد ضفايــرو أسهر
***
أجمع من نجومو الشارده أنظم ليــك عقــود ودرر
وأهديك من رياض أشواقي باقات من ورود وزهر
أقولك شوفي يامحبوبه روضنا بعد يبأاس إخضأر
ونسمـات الصبــاح طلــت تعانــق زهــرو تتعطــر
***
تخاف الليل حكاوينا ونضمها في عنـــاق وسمــر
وتنسج توب أماسينا تظأرزوا بــى غنانـا صــــور
نعاين في البعيد نجمـات أشــد فوقـن قليبـي وتـــر
وأعزف من ربابــو نغيـــم زمـان كـان بيـه يتأثـــر
***
بسمايتــك تطمنـي ويزيـــد بيــها الأمــل .. يكبــــر
وعيونك تلهــب الأشــواق وداخــل قلبــي تتفجــــر
وأتوه أنا في ظـلام ليــلاً تهبّــــو النسمــة يتبعثــــر
ويتمـاوج أمــام عينـّي يظهـــر مـن خلالـــو قمــــر
***
أودع همـــي بـــي رؤياكــي لا أحــــزن ولا أتكــــدر
وأعاهدك إني أصون حباً نما وبين الضلــوع خـــدر
أحس إنـو الزمن صافانـــي قــــربك ولــيّ إتــــــأخر
وأشعر إني نلت سعادة قبلـي أنـا ما لقــــاها بشـــــر

[احمد كسلا]

طريق الحب

ما غلطان طريـق الحـــب مشيتـــو !!
اتعذبـت ايــــه ذنبــــي الجنيـتـــو ؟؟!
***
طريقــــا لاعرفتــــو .. ولا دريتــو !!
لقيـت القبلـــي سايرنبــو ومشيــــتـو
يا جميل ليه بالهجر والصـــد مليتـــو
انا لارجع لي اولو ولا اخــرو جيتـــو
***
النـــاس البعــــاد والفــــي جــــواري
مالن يحكــو فـي سيرــتـي وخبـــاري
انا النيل والفـــرات مابيطفـــو نـــاري
غـيــــر لقـيــــة حبيـبـــًا مالقيـتـــــــو
***
مــاك عارفنـــي سهــــران الليــــآلـي
ليه تتابع ديـل يحرموك مـن وصـالـي
قلبـك اسالــو ان كــان يرثــي حالـــي
وتعود للفـي سجــون الريـــد نفيتــــو
***
رسلـــت الســـلام يــا اللّـــي مفـــارق
ليك يبقي حصن حصين من كل طارق
اذكرنــــي بـيـــــه مــــع المـشـــــارق
وقول ياحليلـــو زول حـــب وسليتــــو

[احمد كسلا]

مع الاقدار

سيـرى يـا اقـــدارى وسيـــرى بــىّ محـل تسيــرى!!
شن يهمك فى عذابى انا اصلى زول مجهول مصيرى
***
كت بأمل ومانى عارف حالتى بيك تكــون عسيـــرى
تطفى شمعات الأمانى تخلـى كلـــو ظـــلام عميـــرى
ابكــى شن فايـــدة بكـاى هـوالعلـى مـاك دار تديــرى
من قســاوتك مانـى لاقــى حتــى كلمــة وآشريــــرى
***
شن بدور بالفرحة تانى راحتى فى الدمعه الغـزيـرى
عمرى مكتـوب لى انوحو ودربـى رماضـه وهجيــرى
وقلبـى فى النيـران يشابـى برضو اقول يا نار اجيرى
السعاده انا وين اشوفـها بالهمـوم عميـان ضريـــرى
***
انا كت متل المتلى راجى الجرتقه وربـــط الحريــرى
فى صـدى زغــروده قجّــت ولملمــت كـل العشيـــرى
والتمـــر بالفــرحـه صفـــق عمّـر الـــداره الكبـيــرى
فوقــو قمرى تـرك نواحــو غنـا سايـر يـا الدخيـــرى
***
والرباب فـوق قوزنا جافـا النومـه للــدغـش البديــرى
حســو بارى النسمـه غــرب عدى بـى بحـر الدميـرى
والقــريـر باشعـارى غنـّــا وليهـا كتّــْرفـى الشكيـــرى
لابسى اوسلى خضارا ترقص قالدى مساوى الجزيرى
***
ما حـــرام بعـــد الأمانـى علـىّ دون النـــاس تغيـــرى
زول اريدو متل عيونى هو ما حـرام يصبــح لغيـــرى
ماحرام يا اقدار تأتمى زول تــلات مـــرات كتيـرى !!
تحرميهو مـن ابتسامتــو وتبقـــى بالآهـــات دبيــرى
***
انتى اصلك جيـت تظلمـى وقلبـى مظلــوم ماتجيـــرى
ولاّ عمــرك ما سمعتـــى الزّيــى سولـو الضـريـرى ؟
داير اقولك قبـــل افارقـــك وياهــا امنتـــى الاخيـــرى
خلـى توبـا اليبقى كفنـى فـى عيونـا يكـــون قبيـــرى

[احمد كسلا]

الهوي يستحيل


أهواكي غصباً واحتمل ويلات هواكي جنس جنس
أهواكي طوعا كونو انو هواكي لي نبضا وحس
أهواك موهدب بين صراع اللقيا والخوف والوجس
أهواك قدر مكتوب علي كيفن من القدر احترس ؟!
***
وآضيعتي وضيعت فؤادي الفيهو حبك متغرس
ضيعت رسايلك واحرفه المن قلبي ما ختت الطمس
همسات غنيواتنا الزمان الكنا نسمعا بي همس
تحت الشتيله نناجي نحن الريده نحلم بالعرس
***
وآحسرتي وحسرت عيون ذرفت دموعا علي أمس
علي صفاكي وروعتك وحديثك العذب السلس
من بعدك الايام خلن والعيشة فيها بلا نفس
كيفن يضوق طعما ويروق زول فصل الاحزان لبس ؟
***
ذرّت أمانينا الرياح خلت عقاب حظي النحس
في دنيا ما تفرحني يوم فيك تاني ترجع وتتعكس
ارجاها بالحلم الضحوك تظهر لي بالوجه العبس
سدس السعادة تقسما وتحسدني في باقي السدس
***
عزيت سهادي علي المنام شوقرت طرفي الما نعس
بالشوق كويت جرح الفراق مع إنو تب ما بيتلمس
في نيتي اصبر والصبر للمتلي فوق طاقة النفس
إلا الصبر جواي مات يوم ما بقيت بهواكي احس
***
شايل عذابات السنين والجوة في الجوف يتحبس
واقف اناشد في الديار يا دار انطقي بعد خرس
قالتلي ما نست العهود ماها التبيع الريد بخس
الا الله يفعل ما يريد وابقي انت للتانين درس
***
كان الله فيك قسم النصيب ما كان شقيّ الحال تعس

[احمد كسلا]

لقيتك

لقيتك في زمن اُخري بعد ما أتربت فيك رجاي
طلعتي من القدر نفحة وسماح قدراً يجيبك جاي
صباحك ياربيع مزهر نهارك ياخريف بكاي
ومساك..وكت يمسي الشوق علي هدب النجوم ناجاي
وأشيل طمبوري أنقنق لك عشان ريدك بقيت غناي
ده ريدك ألف ليله وليل وطول الليل علي الحجاي
رجيتك بالسنين ودنين أدودر في الصبر تالاي
وكت ضهر الصبر يتقص أقيف وألزم همومي براي
وأشوفك بين غيوم الشك بريق شايل الأمل ضواي
أشابي عليك مطير ينزل يغسل في دواخلي أساي
رجاك لا كان ميعاد بيناتنا لاعرفه ووصف هداٌي !
سوي صورة مجهجة فكري ترسما نزعه من جواي
وأقيف ما بين حنين رؤياك وجن العاشق الغواي
أمد إيدي علي المجهول عساي تصدف يداك يداي
اغنيك قبلما ألقاك وتخيل فوقك قوافي غناي
وألاقيك ياشديرة الحن بعد دردح غناك بلاي
شميسن في نهار واحد قدرة الخالق السَواي
شمس ضلاً سماي فيها وشمس حجبت علي رؤاي
لقيتك لاني حان للماضي لا ندمان عليه صباي
محطات العمر يمضي , وكمان , عجل الزمن جرَاي
سماحة الدنيا في عينيك ولقاك علي المودة جزَاي
جزاي علي الأقل شفتك وكت شوفتك علي كفاي

[احمد كسلا]

أصبحت كيف ؟؟؟

أصبحت كيف يازول موكر في الفؤاد
يازول .. معاي رغم المسافات والبعاد
ياخاطرة من نبض الشعر صحيتا من بعد الرقاد
جمعتها إندلقت حروف تنطق بحسنك أو تكاد
يازول هويتو ألم ألم وعود عيوني علي السهاد
نتلاقي في الإحساس دوام لا بينا وعد ولا ميعاد
***
في لقيا زي طلة شموس ترسم صفاها علي الوجود
تدهش عيون الناس جميع تأمر قلوبهم بالسجود
لله شان خلقك سمح وزادك سماحة بلا حدود
تعجز بنات أفكاري فيك تنقص وجمالك في إزدياد
***
ياريتني لو قادر أجمعك علي قلبي يوم وأتهني بيك
أو أطرحك من قسوة تستقبل رسايلي وكت تجيك
أو أقسمك ريد في عيون ياما كتير تسأل عليك
بعدت برازخ الأمنيات وحيرني صمتك والعناد
***
أنا ما لقيت رابط جميل ليك غير جمال الأغنيات
أرهقت شيطان شعري نام ونامت نجوم الأمسيات
دونت آخر خاطرة بيك في موقع البال الشتات
مستني ردك بين هواجس أحلامي والزمن الرماد
***
كلمني طيب خاطري بيك دقات فؤادي عليك سؤال
وين في محطات العمر نتلاقي لو كان في الخيال
أرويني قصة حب عفيف وأكتبني في خاطرك مقال
زملني تحنانك حنان دثرني عطفك والوداد
***
ما كان هواي مسة جنون تتواتا تعويذة وتطيب
أو كلمة من باب الخداع تغويك وينقطع النصيب
أجمع صوابعك وأفردن تلقي الحقايق ياحبيب
الناس معادن تختلف أخلاق طبايع وإعتقاد

[احمد كسلا]

مرسال القمر

طاريك وإنتَّ ماك طارينى .. يا الشوفتك بقت لى محال
حبيب أيه اللى شاغلك عنِّى .. وإيـه الغيَّـر الأحـوال
أنساك ؟ قول لى كيف أنساك وذكراك ديمة شاغلى البال
ومهما طال غيابك عنِّى .. حُبَّك فـى القليـب مـا زال
بقيت بعدك وحيد فى الدنيا .. تايه فوق دريبـك ضـال
أسأل فى النجم وين إنـتَّ.. وأرسِّـل للقمـر مرسـال
وديمة مع القمر تلقانى .. أساهر ليلى حـد مـا طـال
أحنِّس فيهو .. أقولو أمشيلو .. جيب لىَّ الوصية تعـال
وكتين القمر يتضارى .. ونجمن حولـو غـرّب مـال
فِرِحْ طِرْ .. بى جناح أشواقى .. حلق فى سما الآمـال
قلتَّ هدا القمر فات ليهو .. ليهـو بيشـرح الأحـوال
يحكيلو الحصل فـى غيابـو .. وآلام البعـاد الطـال
يبقى يحن يعيد الذكرى .. قلبـو بعـد نسانـى ومـال
يبكى متِلْ بكاى لى شوفتو .. يرجع لىْ يجود بوصـال
بقيت فى الإنتظار راجيهو .. محتـار والفكـر شغَّـال
أقول يا رب متين تجمعنى .. بـى خـداً كساهـو دلال
وأسعد بالكليمـى الطيبـى .. والبسمـة التَّسُـرْ البـال
وأشعر بالعلى فى حينو .. من فدْ نظـرة ولَّـىَّ وزال
أتاريهو النّجـم ضلَّلْنـى .. مـا راح للقمـر مرسـال
أتَّارى بنيت خيالى حقيقـة ..وإتقلبـت حقيتـى خيـال
وأتارى أنا كُتْ بطمِّنْ نفسى .. بى وصلاً بعيد ومحـال
والحاضنة ألأرض خطواتو .. مابنول فى الثريَّا منَّـال

[احمد كسلا]

التحدى

نومي اصحي على غرورك معاك لازال التحدي
وآي طريق يوصل لي قليبك منى سدى
ده لو كان تلقيهو صبرا يماتل صبري وتمدي
صبري عليك أنى صابر تشققي قليبي وتلحي
هيا ابعدى كل العواطف واشاورك من وين ضرورى
لاتزيدى مواجعك على لا ترجعى فرحى وسرورى
فى الحالتين راضى عنك تنصفى او كان تجورى
وسمح حكمك زى سماحتك وبرضو قسيمة الله سمحى
اوعى تغرك سماحتك سماحه الغنا يانى سيدها
سماح يبلى مع الليالىيبقى سماح القصيدة
اخلخل بيها المشاعر واتوها ازمان عديده
وفكرتها انتى وبيانها وكدى اقدرى من خاطرى زحى
او انفذى كل ما اسطتعتى مداركى ابعد من سماء كى
وجوبى اراضيكى تلقى جنونى تهاجر وراكى
اسلكى كل العوالم خيالى بيدرك مداكى
انا الكون المحتويك يا قصيده فى الجوف توحى
احبك احبك ويسعدنى حبك وقت يبقى حلوهو مرو
احبك غلبا يقطع والملمو فى الجوف واصرو
انا المجنون البيعشق مرامى الريد التضرو
قبلان بى ضررى راضى منو القال ليك ضحى
شيشك بى بشيشك اصحى صحاك ونومك بيشفق
وجيبى جفاك وازرعيهو قصاد الحن المدفق
كفاية اشوف فى عيونك تغنى الدنيا وتصفق
بعد داك نومى اطمينى ولومك فى خاطرى ممحى
..

[احمد كسلا]

دون العيون


أنا أخترت من بين العيون ياغالية عينيك أعشقا
وأخترت شوفتك كل يوم لو حتى شوفتك أسرقا
لكني مالاقي الفرح لا في البعاد ولا في اللقاء
وما من هواك .. أنا أصلي عاد خلقوني من طين الشقاء
مديت كتير حبل الصبر لامن فقدت أنا أولو
ومن غير صبر بقدر أساي ياغالية شانك بحملو
بس لو سمحت ومرة بس داير قليبك أسالو
حافظ معزّتو زي زمان ولا الحصل كان بدلو ؟
والله يا نور العيون أصعب سفر سفر الأمل
تلقاك تعاين في الهدف .. وما داري أنت متين تصل
كل الدروب جربتها وسافرت فيها عشان أصل
وفي كل مره الف وأعود من تاني لي نفس المحل
سيبي العواطف ديك بعيد .. وأنسي ريدك وقولي لي
أيه الفرق لو زول زرع أمالوا في أخصب ودّي
والتاني روح للبعيد وأختارلوا يا محبوبة صيّ
حايحصد الأول أكيد والثاني زي حالتي العلي
ولو جيتي تسألي عن هواي بالله أسالي عن هواك
تلقي الجواب نفس الجواب ماقلبي يادنياي معاك
أرجوك أوعي تفكري أنو قلبي يصبح لسواك
لكن لو فقد العشم يمكن أقولوا خلاص كفاك
أنا عارف المواجع لي براي أنا طول سنيني أبكي وأنوح
فقدت أحساس الألم ياروحي من كُتر الجروح
ومابلقي عارف فرحتي غير فيك يا أم وجهاً صبوح
وكفاية كل القلتو ليك .. أنا تاني مابقدر ابوح

[احمد كسلا]

الحلم حقيقة

بحلم بيك ما فت الخاطر ياريت يبقى الحلم حقيقة
ياريت الايــام تجمعنا وفيها نعـوض كل دقيــقة
***
يا راجياني عشان أهديكي غنوة ريد في صورة أنيقة
ماك متخيلة ينظم شعري يغرق فكري في اه عميقـة
انا ماعـدت الزول البيفرز مابين النـار والتاتيقــة
دمعة علي لوحة أحزانة رسمت في الاقدار بي ضيقة
***
لاتلوميني ان مارسلت حتى ان كان سطرين في وريقة
لومي متاهت الغـربة الفيها منها ما بتنشلة طريـقة
تنشد حـالك وتشـرح حال الزول المالاقيلو وتيقة
شوقك وشوق الوطن الغالي مضروبين في صدرو بديقة
***
وينك منو وينك ليهو وين أمالو ووين تحقيقة
دايمن يقعد في اوهامو يبني وتتهدم السريقة
فكرو يساسق بينك وبينو لا رتاح لا مل الساسيقة
كم ابواب في وجهو انسدت زي ما الرجعة انسد طريقة
***
وينك لما شمشنا تغرب رغم الموجة يصلنا بريقة
لما الموجة تعانق الضفة في تحنان تغسلة رشيقة
وافضل اتابع السرب العايم في نظراتك والحديقة
فجأة تشع من ثغرك بسمة وتأسر قلبي وروحي تشيقة
***
راجعليك يابت عندية ودخلت قلبي في ساعت ضيقة
حلفت ماتمرق بي هيني اتعزفت جواي مزيكة
شالو النمة معاهة تلاتي متهكرين في ضل كليقة
سكنو جوف الليل الكافر شان الصبح تشق قارسيقة
***
راجعليك يابت ريفية وتخفي سامحتة في التاويقة
لا عارض يمنع مسـاري للأيام خطواتي تعيقــة
راجعليك رجوع النسمة الجات في الحقل صفيقة صفيقة
كان الناس عني دربي اتخلو انت بتمشي معاي رفيقة

[احمد كسلا]

حبيبتي أنا


بتسألوا عن حبيبتي أنا

وسعادة عمري في الدنيا
الوراها فنا ؟؟
***
دي آمالي العريضة البيها أشوف
دنياي سرور وهنا
وصباحي الزار بعد ليلا ً
سهرتو ضني
حبيبية عمري , آمالي وأعز مني
وشعوري الفايضة في جواي
هناك .. وهنا
وحروفاً ديمة أفخر بيها وسط الناس
وفي الدارات أشيلا غنا
دي حبي البين ضلوعي
إشراق ونور وسنا
تسألوا عن حبيبتي انا ؟؟
***
اسألوا عنها بتلقوها
في كلمة سلام ما أتقال
وما قالو الحبيب لحبيبو ..
أبدأ .. وما خطر بالبال
في رنة نغيم سلكاية ..
وفي سيرة العديل والفال
وفي زغرودة في الدارة
وادين مرفوعة للشبال
بتظهر في جلال لقيا
وتبين في براءة أطفال
بتسألوا عن حبيبتي أنا ؟؟
***
حبيبتي نغم حنين ..
ينساب مع موال
من عالم بعيد جواي
يموج بالبهجة
ينسيك إنو لينا زوال
فيهو أحلم وأشوف واحات
خضرة كست تلال وجبال
عالم في ترابو الغالية
ما حطت رحال ورحّال
وما عبرت سهولو أحزان
ولا هجرت رحابو آمال
عالم .. عندي أشوفو حقيقة
إلا الناس تشوفو خيال
تسألوا عن حبيبتي أنا ؟؟
***
حبيبتي أنا من عهود الريدة
عهداً باليمين أوفيهو
وحتي ان كان شقيت في دابا
قلبي تكون سعادة عليه
شان لولاها ما كان ينسي
أيام مرة من ماضيه
شان لولاها ما كانت
تزور البسمة يوم شفتيه
شان لولاها ما دنياه
باسمة والحزن ناسيه
وشان لولاها
ماعاش في نعيم
الناس تحسدوا عليه
تسألوا عن حبيبتي أنا ؟؟

[احمد كسلا]

سنين الشقي





ليه ما اكتب وليه مااغني صبرت انا وانتم مرادي

سنين الشقي مني عدن معاك ولتني السعادي

قربي لي ياحبيبه تعالي نشبك الايادي

يجونا الاحباب يباركو فرح فوق الوجوه بادي

تريبت ذينوبه ترقص مشاركي حتالت الولادي

ياندي الاذهار صدقيني يضمك ويهواك فؤادي

اشتاق ليك وانتي قربي واهيم بالشوق في بعادي

مابيقولو الريدي الكتيري اساسا للجن مبادي

وانا اليهديني من ريدك اخير يمشي يكوسلو هادي

هويتك وقدست اسمك وقف فوق باب العبادي

بقيتي الكعبه والقبله تطوفبك روحي وتنادي

حسد قلبي انا في هواك ماهواك علمني الحسادي

شقاوتي ان مالقيتك وا مغصتي وشمت الاعادي

مره في ليل استني حبك غبيت بقيت ما اعتيادي

شفتك فوق سماي وعليكي المخلوق تنادي

نور او نار ماني فاكر هي من عيونك شرفن قصادي

وحااتك قربت اكفر رجعت قلبت الشهادي

بريدك ماكان لي ساهل بناني ابلك رقادي

مني كان المجنون يقصر شوفي خوفي ولهفي الذيادي

تره الناس بي شوق نبيها من المالي حفاتو غادي

الا شوقك حابني تنقاسي اللحج فيها والتبادي

سنين اسفي مع السلامه اخيرا صادف ودادي

نور فجري طل ظهر واتبدد سوادي

فرحان والكون ده فرحه تقول الليلي ميلادي

انا ما لقيت شافعتي البريده هي بكره تكون ام ولاادي

[احمد كسلا]

الله عالم ياحبيبه








الله عالم يا حبيبة إنتي في دنياي تمنى
بيك عاد إشراق صباحي وراح ظلام أحزاني مني

البمر أيه بي خواطرك مره لو سألوك .. عني ؟
دار تقولي أيه لي عوازل .. لا تبارك لا تهني ؟
قولي ليهم حبو سامي وقصدو يبني معاي جني
تاني فيها يعود ربيعنا ويحضن الأزهار يغني

أحكي عن أول لقانا وكيف معاك سارت خطاي
وعن مقاطع شعري لمن تندفع بي فيض هواي
مافي لحظة تمر بي خاطري إلاَ وأشواقك معاي
وكل أول ليه آخر إلاّ حبنا ... لا نهاية

أحكي ليهم عن صلاتنا ونحن بينا صلات حميمه
كيف روتنا وظللتنا وأصبحت في سمانا غيمه
لو تكون البينا عامري ياها جنتنا ونعيمه
مالنا مال الدنيا تاني أريتا ما فاتت جحيمه

لو يقولوا ليك خيالي في خيالي بقيتي صوره
أعذريهم ما بعرفوا إنتي نور عيني وسروره
لو يقولوا ليك بفارقك كيف تفارق القمره نوره
ولاّ عمرك يوم سمعتي بالفراش هجرت زهوره

بكره لما يجوك يسألوا كيف مع الدنيا وفراقه
قولي ليهم في بعادنا وفي قربنا نظل رفاقه
نحن ناس عاشت نفوسنا في وفا وأنبل صداقه
وحتي في الأحزان بنفتح لي دروب أفراحنا طاقه

أما أنا سألوني عنك وفي هواك أيه الرماني
لالا والله ده سر مقدس كاتمو في الأعماق وأعاني
كل كلماتي وحروفي ونظمي و أشعاري وبياني
توحي إني أنا قطعه منك وبكره راجع لي مكاني

[احمد كسلا]

أحلى مافي الكون عيونك
احلى مافي الكون عيونك واحلى ما في الكون سروحها

يوم تغيب تسلب رويحتي ويوم تعيد لي روحي روحها
فيهن اتغـرب وأسافـر نفسـي تقبـل بـي نزوحهـا
ألقى جنة شوقي فيهن الحنان مشتـول فـي سوحهـا
داير اعيش فيهن وأفارق دنيـا كـان شاقينـي نوحهـا
وأنسـى ايامـي العصيبـة كـل آهاتهـا وجروحهـا
في عيونك كون بحالـو فيهـو أسـرار مـا بلوحهـا
كل ما اتمعنـت فيهـا فيهـا اشـواق بابـل بروحهـا
وأفضـل اتضـرع أمامـك رافـع اليـد اللحـوحـة
أملي يرقص فوق سوادن زي بريق ياخد لـو لوحـة
فيها كم شاهـدت واحـة الرمـوش ضالاهـا دوحـة
وفيها كل الدنيـا ترقـص بالطـرب ناسياهـا روحـة
صورة ماأحلاها صـورة مـن جنـان الخلـد لوحـة
ياهو دا الخلاني أحلف مافـي زي عينيـك صبوحـة
بالفـرح أيامـي لمـن بالفـرح كـانـت شحـوحـة
كيف يقولو اخير تسيبن الله خلقـو دي مـا نصوحـة
هن سعادتي وهن شقاي هن أمان روحـي الطموعـة
كان غلطت استغفر الله باقي عقلي اخـد لـو روحة
كلمات الأستاذ/المبدع إبراهيم أبنعوف

[احمد كسلا]

عينيك دنيتن تشقينى

غناء المرحوم القامة / النعام آدم



عينيك دنيتن تشقينى وفيهـا القـى السعـادة ارتـاح
مرة تجود على تشفينى ومرة تزيـد قليبـى جـراح
فيهـا تمـر تعـدى سنينـى بـى آهاتـا والأفـراح
ويومن فيهو تنعم عينى ويومن كلـو اقضـى نـواح
حالفة على دار تفنينى وبرضى أبسم واقولهـا صـاح
مادام العلى راضينى كيف فى احكاما أدور لى سماح
يعدى شتاها صيفا يجينـى بـى حـراً شديـد لفـاح
ويبقى شرابى دمعة عينى اطمن فـى القليـب النـاح
اقول داك السحاب غاشينى شوف يى داك بريقو اللاح
اقول يبقى الخريف طارينى يتفرق عصـار وريـاح
وبى ده أنا كلو ما هامينـى لا لا ولا شبابـى الـراح
أداوى جراحى كاتمو انينى عارفو عذابى ليها مبـاح
تبسم لى كتيـر تغرينـى واحكـى البلبـل الصـداح
وترجع بالسهر تورينـى ليلـن مـا لقيتلـو صبـاح
لا لا وحاتا وحات دينى لو فى موتى ليهـا صـلاح
ماب أقبل كمان يفنينى بالموت غيـر سلاحـا سـلاح
ابقى إن مت سديت دينى وابقى من العـذاب مرتـاح
وبعدين ذكرتك تكفينى وشعـرى اليبقـى لـى منـاح

[احمد كسلا]

لاتقولى مع السلامة

بتمشي من غير ما توادعي لا تقولى مع السلامه
برضي ما قادر اعاتبك ولاّ ارمي عليك ملامة
ليه تسافري بدون توادعى يقسى قلبك وين حنانو
كيف عليك العشرة هانت ريدنا ليه لحظاتو هانو
بين مخاوفى وشوقى ضايع لما سفرك حان اوانو
قلبي كان متمني شوفتك يا العليك تكلوا ورهانو
فى السراب صدقت مخاوفى ظنى اصبح فى مكانو
ما الزمان دايما معاند واصلوا ما مضمون أمانو
عدي فوقى العيد وروح لا معايده لا إبتسامه
من بعادك ونار فراقك قلبي عيديتو الندامه
لا خلوق طلت تبارك بي تهانيها وسلامه
لاالعيون اجفانه لا قت لا استراحت فى منامه
فى الغياب سيرتك معايا ياما ناجاك قلبي ياما
كلما لاوحلى طيفك ابكي بي دمع اليتامه
يا مسافري على بلدنا شايلى روحى معاك هديه
ليك وللناس الغلابة برضو شايف الروح شويه
داير اوادعك كنتا واكتب فى سواد عينيك وصيه
ابقي ميه على عيونك ريدنا ابقي عليهو ميه
سلمي لى على ترابنا كل شتلاتنا النديه
وقولى للوالدة الحبيبه انا جاي في عيد الضحيه
كلميلى ابوى عنك عن بنا الريد والمحبه
شيلى من بركات عيونك ادى اصحابى الاحبه
امشي يوم جمعه الضرايح زورى فيهم قبه قبه
أطرى درويشاً تلاقيه لبيسيهو أشواقى جبــــه
قولى للوطن البريدو قلبي بالاحزان معبا
غربتي الطالت شقتني وكل يوم زايدانى غربه
لما ترجعى بالسلامه جيبي لى معاك نسيمه
من بلدنا وجيبى لى من طنابرتا كم نغيمه
فوق جمر راجيك تعودي تومه لى روحى اليتيمه
تاني لى قبال تسافري وتبقي فى صيف عمرى غيمة
وتبقي فى الابد المؤبد خالدة عشرتنا الحميمه
ريدة تجمع بين قلوبنا عامره بالنيه السليمه

[احمد كسلا]

مرارة اللقيا

غناء المبدع / عبد المنعم فارس


وكت الزول يقابل زولو ما يدي السلام في تلاقي
الله من مرارة اللقيا في لحظة عميرو الباقي
****
يا سابل النظر تالاي مالك ما بتعاين لي
خايفة تشوفي حالي الفيهو ما انتي الفرضتي علي
حزني عليك اقول اخفيهو يفضحني ويبين في وشي
ما بين الحزن والذكرى تمتزج الدموع باشواقي
****
لا لا انا ما بكيت من ضعفي نفسي انا في هواك ابية
باكي علي ضياعك انتي اتنين راح يروحو ضحية
لو حكمتي نفسك تلقي بينك وبيني مافي قضية
الا بس الاباليس حامو واغروك ترضي بيهو فراقي
****
مهما ابعدوك منو دربي مهما قالو ليك وقالو
برضك عندي زي ما كنتي ياكي منى القليب وآمالو
قبلان بالشقى وراجيك ما الحب في شقاهو جمالو
لو ضاعت عهود الريد انا الوفا شيمتي واخلاقي
خليهم يساسقو ويجرو كل زولا فعالو قبالو
ان كان قدرو حققو غاية بي دجل الفقير وضلالو
معقول ارضي كتر ميسونا والطير ضحى شان اطفالو
****
مش لو كان عرق او ورقة لو جا الشيخ مع العرافة
وايه يعني الخصام بيناتنا عشان ناس المحبة سماحة
والفي قلبو اكبرواقوى من اقسى واشيلو قباحة
عنك قلبي ما متخلي لو قام السبيب في الراحة
راجيك يا منايا تطلي لي ابواب عذابي تتاقي
متأكد تكوني حسبتي فراقي وهسا ما مرتاحة
بينك وبين ضميرك عارفة بس ماك دايرة تقولي صراحة
معليش حاولي تاني وتاني لا بد الوصول للواحة
قلبي معاك خطوة بخطوة يا فرحي وشموس اشراقي

[احمد كسلا]

سلام مطبوق

غناء المبدع / صديق احمد عافاه الله


فسراع يانسايم أشواقـي ودن لـي السـلام مطبـوق
لاهلنا وجميع حبانـا فـي الحلـة التحـت والفـوق
****
هبي علي الشمال تلقيه ده المال فـوق جريـده يتـوق
يتراقص مـع نغمـات قماريـه .. التسـوي القـوق
بي طيبة الحنان يلقـاك يهـش ليـك ويطـول لفـوق
ويكتر في السلام يقلد مثـل عاشقـا لـي المعشـوق
****
هناك ساقةً محاضنة النيل تدفق فـي دمـوع الشـوق
تتبكي وتبكي الـزول وكـت نـص الليالـي تسـوق
باري جديولها اطلعي فوق وشوفي دحين شنو المسيوق
وبعدين بي بشيشـك لفـي قدّامـك شتيـل مكـروق
***
داك حالي الرحل مندلي جايـب للخضـار مـاروق
وداك بدر يحش في قشيشو عجلان باقي لاحق السوق
وداك قراع مقرن مويتو فتـران دار شـوي يـروق
عشان يفتل حبيل يربطبـو قادوسـا نعـس مطلـوق
ديل اهلي الحنان يانسمـة اهديهـم سلامـي وشـوق
طول داير ازورهـم مـرة الا قديمـي ..مامطلـوق
وان سالوكي عن احوالي البـي مايصيـب مخلـوق
تاهـت بـي مراكـب الغربـة لاريـس ولاواسـوق
****
والدرب المسافر بيه فـي طولـه بتهابـه النـوق !!
خمس سنين قعد في ظلامه ما بان لي صباحه شروق
اساهر الليل مـع الباكنـوا يتجـاري الدمـع سبلـوق
وابكي علي الزمان الفات وما اظن البفـوت ملحـوق
***
انسلب اللحم من جسمي واصبح طب عضام وعـروق
واما قليبـي لوشافـوه بـي نـار الغـرام مشقـوق
لا لاقي اليحـن فـي حالـي او زولا علـي شفـوق
وان بقي عاد دي حالتي البي ما اظن للسعادة اضـوق

[احمد كسلا]

رسالة ألي دار البقاء

غناء المبدع / عبد الرحيم البركل


شـعــرى الـحـزيـن يـــا يـمــه يـحـكـى
لـــيــــك كـــيــــف بـــعــــدك أنــــــــا
وكـيـفـن كـمــان فـــى الـدنـيـا رحــتــا
وتــهـــتـــا فــــــــى درب الــغـــنـــاء
يــانــى الـجـنـيــت عــلـــى الــزمـــان
أو كــــان زمــانـــى عــلـــى جــنـــى
شعـرى الحزيـن يـا يـمـه يحـكـى لـيـك
ساعة جن قوافل القدرة ساقنـك معاهـن
ورحـــتــــى لـــــــى دار الــخـــلـــود
سألتا عنك يايمه مـا خليـت دار (جـار)
وبـكـيـت عـلـيـك مـــن غـيــر حـــدود
ويـــن أمـــى يــــا نــــاس الـفـريــق ؟
نــــزلـــــت تــــحـــــت خــلــتـــنـــى
لـــيــــه مـــــــا كـــــــان تـســوقــنــى
فــى سـاعـة الحـلـيـب عـنــد الـــورود
ويـســكــتــونــى يـــايـــمـــه بـــــــــى
تــعــريــفــه أو حــــبــــات تــــمـــــر
ويـقــولــوا لــــــى أمــــــك مـــشـــت
ســــوق الــشـــرق وهــســـع تــعـــود
صــدقــتــا أنــــــا مـــــــا عـــارفــــك
يــايـــمـــه فــارقـــتـــى الــــوجـــــود
ومــــا عــــارف إنــــى وراك اكــبــر
واجــــــــرى بــــــــدرب الــبـــنـــات
قـلـبـى داك مـاهــو الـرهـيــف تـلـقــى
يـمـه يـشـابـى كـــل مـاواحــده جـــات
ولـــــولا الـعـمـيــر عـــنـــد ســـيـــدو
كــــان بـــــدرى سمـعـتـيـبـوا مـــــات
وقــصـــة شـقــاوتــوا وراء الـبــنــات
يـــايـــمـــه تـــــــــب مـابـتـتــحــكــى
يــــمــــرق صــبـــاحـــوا يــلــمــهــن
يــضـــحـــك مــعـــاهـــن يــتــبــســط
ويرجـع وراهـن تانـى للنـوح والبـكـى
عـذبـنـوا جـرحـنـوا مــــن الــجــروح
مـا لاقـى صفحـة عليهـا يـرقـد ينتـكـى
ومالاقى صاحب وجعة يبركلوا الفكـى
ناس المحنه يمه فاتو وخلو ينين يشتكى
أهو غايتو حالـى حالـوا مـا حـالا بشـع
لـلـيــلــى جــــــارى وراء الــبــنـــات
يــايـــمـــه لا اكــتـــفـــى لا قــــنـــــع
بـس الفضلـو تجيهـو بالليـل فـى المنـام
تـهـديــهــو لــــــى كـــــــان يـقــتــنــع
ولا انـدهـيـلـو يــمـــه رب الـعـالـمـيـن
والأولــــــيــــــاء والــصــالــحـــيـــن
إن كـــــان يــتـــوب قــبـــل الـعـمـيــر
فـــاضـــلـــوا تـــــــــو مـايــنــقــطــع
اهـو غايتـو حالـى يمـه نوحـى واسـاى
بـكـرة الـقـدر كــان جـــاب رواحـلــوا
وجـــانـــى شـــــــن خــلــيـــت وراى
غــيــر عــبــرة فــــى لــيــلاً طــويــل
ودمــعــات سكـبـتـهـا فــــوق أســــاى
وصـبـحـن بــقــن شــعــرى وغــنــاى
مايـاهـو قــدرى وجـانـى عــاد بـــراى
مــالازم اصـبـر كـمـان واتحـمـل اذاى
وعشان كده أنـا اصلـى مـا حدثتـا زول
ومـــــا دايـــــر زول فـــــى الــدنــيــا
يــــكـــــون مـــتـــعـــذب مــــعـــــاى
بس داير اقولـك شعـرى البهديهـو ليـك
امسـكـى عـنـدك واحـفـظـى وختـيـهـو
لــمـــن ولــــــدك الــغــنــاى يــجــيــك

[احمد كسلا]

عيني بالدمـوع مليـاني

عيني بالدمـوع مليـاني عيني بالــــدموع مليانـــي
ماعـارف المحن بمشيلا ولا هي قاصــدي تتلقاني
***
ليه ما اكتب غنـاي بدمعي وامزج بالحزن الحاني
اشعار تحكي عن مأساتــــي تشـرح للبعيد والداني
***
داير اقـــولا ياخلق الله ياخلق الله مــــــالو زماني
لارحم الصغر في صغري لارحم الكبر في كياني
***
الناس في سعــاده وبهجه انا بحر الهمـوم ضماني
وين قـــارب نجاتي آخلقو ولا انا دايمــا الأخراني
***
ياريت السعــــاده قريبي كان تسمعني أو تلفـــاني
لكن كيف أصيـح ليها والعبرات معضــــي لساني
***
اهرب من دناي وين أمشي ياريت الامــاني اماني
طال ما الدنيا ياهـا الدنيا طال ما ياني ياني انا ياني
***
ياسجم السجم يابخـــــــــتي ياحظــي المولي وفاني
كيفن في الشقــــاوه عترتا والخير فاتني وإتعــداني
***
اه يامرتـــــــي المليــــــوكه يانار قيدي قيـدي وتاني
من مغصا مقطع قلــــــبي في جــــواي كاتمو لساني
***
اه ياقدري كـــون في همي راجيك من قبل ترجـاني
هـــــــم وأحـد بودر سيدو متلمــات علـــي تمــانــي
***
في ها الدنيا شــن ســويتا متعـــــــذب كانـي الجاني
شان لاتبــتا لااستغفرتا من حب زول مـلك وجـداني
***
حتي الكان كفر بي سببي دا بي صور الجمال أغراني
اصلي انا من لمحـــــتو كفرتا إتشهـــدتا وأســـلم تاني

[احمد كسلا]

الروح الشقياني


الـزول نسانـى وفـات صـدا ونجـع تانـى
كان منو ولا اقـدار مـا ذنبـى يـا اخوانـى
انـا شلتـو فـى الأعمـاق فرشلـو وجدانـى
واسميتـو فـوق الكـل بشعـرى واوزانــى
عاملـتـو بإحـسـان رقـــة قـلـيـب حـانــى
كات فى النهايـه إنسـان مـا قـدر إنسانـى
شان خاطرو ضقتا المر اسعدتو واشقانى
اوصيهـو بـالاخـلاص ينسـاهـو ينسـانـى
فقدنـى للتميـيـز بـيـن فـرحـى واحـزانـى
ناجيـت بعـدو الليـل مـال نجمـوا خلانـى
راقــد رقــاد المـيـل شـمـاتـى فـرحـانـى
اتـبـاكــا لــلأيــام والـعــبــره خـانـقـانــى
إلا الـدمــع مـــا فـــات نـــاراً مـوالانــى
بالله يـــا اشـــواق لـــى ويـــن مـودانــى
دى السكه طالـت بـى وانـا فيـه وحدانـى
مالـى غـيـرو مــلاذ فــى دنيـتـى الفـانـى
وان قلتـا منـو اتــوب يحميـنـى شيطـانـى
يــارب زى عـيـنـى عينـيـهـو سـهـرانـى
او حالـو نعـم الحـال نايـم غـريـر هـانـى
انا عارفو قلبـو بعيـد لـى قلبـى مـا دانـى
انـا ليـك شكيـت الحـال بالفيهـا مـا يـانـى
دايما اصيح فـى الويـل والدنيـا طرشانـى
يـاالله كـون فـى عـون روحـى الشقيـانـى

[احمد كسلا]

من فارقت واديك


من فارقت واديك قلت تميت حـول ..
كيف يبقة العلى وأنا للسنيـن عديـت
أنا صابر يا سحاب حولا وراهو الحـول
وعارف يوم وقع فى حبـو مـا سميـت
تراك وسط الدوع تضحك بريقك شال .
أما انا يا حليلى العمـرى مـا فريـت
روح يا سحاب فلـل عليـك الليـل
وبلغ لى السـلام لـى دارو ان مريـت
كلمو بالحصل لـو تانـى لـى يعـود
وأوعة تعاتبو شان يزعل يقولـك أبيـت
وبعـد الـحـول تـعـال غاشيـنـى
برجاك فى محلى دة أنا بقيـت حييـت
وان بقة ما لقينى ابـك علـى ونـوح .
واعرف انى مت بى شوقـو واتفكيـت

[احمد كسلا]

افـوض امـري لله

غناء المبدع / عثمان اليمنى

قلـت اصبـر افـوض امـري لله
مادام الزمن عاكسني ضوقنى المزلة
***
البقول الحب محـن ماجابـا زلـه
تايـه فيـه لمـا شبابـي .. ولـي
يوم من عمري ماشـف خيـره الا
غيـر همـو وعذابـو الـي حلـي
***
الغـرام قفلـت بابـو علـي طـلا
فكر فـي الشـراد مالقيـت محلـه
كرهت الدنيا حالتـي بقـت مملـه
مالي دون خلق الله فوقي وتحتي مله
***
لي منو اشكيه الاذاني بقالـي علـه
سلب لحمـي ومنـام عينـي قـلا
مادام قاضي فـوق كرسيـه اتعـلا
وكمان كتل النفوس في شرعه حـلا
***
وادي الزارعو سيدو ثمـاره اندلـي
مسكين مابيضوق لي سعـرو غـلا
النموت مادام زمان الرحمـة ولـي
يبس شدر الحنـان نمـت المزلـة
***
ساعة مال وانفدع ولي ايـدو تـلا
برز لي حـراب صـدرو المعـلا
سبل لي رموشـو وحاجبـو عـلا
نفسي انـا لاطلـع لاتانـي اندلـي
***
انـا الخاتيـه فـي اعظـم محلـه
لكن كـان ده منـو جـزاي واقـل
مابنـسـاه لا لا والــف كـــلا
حبي انا عنـدي شـي يعلمبـو الله

[احمد كسلا]

طير الغروب

أسكـت كفاكـا رطـن
قبلك كم بكيت وكم من نفوس يبكن
***
بكاك الفـراق راحـل بعيـد تسكـن
ولا فقـد جنـاك واصبحـت متجـنـن
تـرى الفاقـد جنـاه وراه .. متيقـن
وما كل الرحـل فـارق ديـارو حـزِن
***
إنت المك ماهو زى ألماً على مُزمـن
وفقدك لو تقول زى فقدى ما ممكـن
فارقنى البريدو حياتى عـاد كيفـن
وفتقلى الجروح قبـل الجـروح يبـرن
***
نيران الغـرام فـى حالـى مابيرتـن
ساكنات فى عضاى يصّبحِـن ويمسـن
كـل الاشتكيلـو اقولـو لـى .. طمـن
يقولى ما بتطيب انت اتمكنت مكـن
***
كل أسبابى من زولاً صغير فى السـن
سيافـات رموشـو والعيـون يـرمـن
بسمة فاطرو تضوى الليل بعد يدكـن
وان جيت للخدود جلّ العلى الصنعـن
إتحيّـر بقيـت فـى أمـرى متمحِّـن
أحفّر فى الارض مرات براى وادفـن
حِيلـىِ معـاه لا بجيـبـن ولا بــوَدّن
دا الغارى الجمال وفى طبعه متعجِـن
***
داير اكتبلو أقولـو قليبـى متبشتـن
يتوحـوح كتيـر ريشـاتـو يتـهـزِّن
يبكى الماضى وأفراحو الرحل زمنـن
مسكين ما لقى الفى حالو يرتى يحِـن
***
قالك فى شبابـك يـوم أخدلـك إذن
لاترجّـى الاجـازة دة للإجـازة بـجِـن
لو فاكر حيصبر زى قبيـل مـا أظـن
يتصبـر وراك ربـع القبيـل صَبَـرِن
***
من وسط الجحيم ليكـم رسايلـو بِجِـن
ويهدى ليك سـلام وتحايـا مـا بغِبّـن
ما أشرق صباح بى يوم جديـد يعلـن
وما عانق نسيمو فريع رطيـب ولـدِن
***
ما سالن دموع فـوق الخـدود يجـرِن
وما ناح العشوق يبكى الفراق وغِبِـن
وما سهرن قلوب جار الزمـن ظلمِـن
وعَد ما ابواب وصالك ليـه يندسـدن
***
إبتدى فى الكتابـة عيونـى يتقـدِن
زكلما كتبت كلمة القى الدموع يمحِن
خليت الكتابـة أهيـا الدمـوع صُبِّـن
واجرن لا تقيفن وفى الصبيـب جِـدِّن

[احمد كسلا]

وطـني علـيك السـلام / من القصائد التى كتبت بالفصحى

سلام موطني ومكان مهدي عليك من المهيمن ذي الجلال
ورحمته تعمك كل صبـــــــح اليك من السموات العوال
تصب حيافتحيا الارض زرعابسح السحب من قبل الزوال
وبركات يجثن على ثراك يجــــــود بهن غرسك من نوال
اليك اتيت يا اوسلي وكنت قتيل الوجد من بعد الوصــال
اسائل كل نسم منـــــك آت ويعجز ان يرد على الســـؤال
فأرسم صورة لك في البعيد ويعجز عنك نسج في الخيال
وكم من ليلة ارسلت طيفا لطيفك عله بين الليــــــــــالي
احبك يابنة الســــودان حبا على الازمان لم يخطر ببال
ففيه وجدت للايمان ركنـــا يريح القلب من نزغ الضلال
تسام الروح دونك وهي فرد فحبـــك جاء بعد الله غـــال
وكم سلم الذي خاض المنايا ورعديد يموت بلا قتــــــال
وإن كان الخليل يبث يوما لعزة ما بــــــــراه من الهزال
وشوقا قد اذاب اللحم منه وصار الجسم اشبه بالخــــلال
ومات مع التمني لسير حاف وجلسة خــلوة تحت الظلال
أعاد الحب روحه للخلودورقاه اللا رتب المعــــــــــالي
كذا الاوطان تصنع من بنيها رجالا يذخرون لكل حــــال
فمنهم من يفي الاصلاح حقا ومنهم من يموت على النضال
رضعت الشعرمنك كنت طفلا وجئتك شاعرا فذ المـــــقال
فأدهشني الذي اوحيتنيه بانك هالة في ذا الجـــــــــــــلال
كأنك غادة في يوم عرس يزف اليها ذو جاه ومـــــــــــال
كساها الزرع من خضر الثياب ولفها قرمصيص من رمال
فأنت لنبتة نسب وفخر وسحرك بابلي يغير بــــــــــــالي
ونيلك جاريا عبر القرون يجــــــــود عليك بالماء الزلال
اذا حل بك الغرباء يوماً يرون النخل رهطا من مـــــوال
ومن شهد المحاق على ثراك يخال اليه ينظر للـــــــهلال
وتاسعة الجنان على الاديم يطفن عليك ربات الحجــــال
تدانيهن في الاوصاف طراً وعيبك ان مالك للــــــزوال
فسبحان الذي اهداك سحراً وزانك دون غيرك بالجــمال
وارسل نسمةً تصحيك فجراً لتغسل وجهك انداء الطلال
وحببنا ترابك ان مشينا نخاف عليه من وطئ النعـــــال
وأما اليوم نفتح مصراعيك ليمشي عليك شريان الشمـال
نقيم لاجله الافراح عيداً للتاريخ اكبر احتفـــــــــــــــال
نقدم فيه للسودان عهداً ونحن الفاعلون بلا محــــــــــال
علمنا الولى قيم الوفاء نســــــــــــيربها على نهج الاوال
سنرجعه وريداً ما حيينا من الخـيرات والثمر الحـــــلال
فيا سودان نحن بنو ملوكٍ اقاموا العدل في الاول الخـوالي
وابناء اولياء ٍفي العصور اشاعوا النور بالنهج الرســالي
لنا في الدهر اعظم امهات نشأن على الشجـــــعة لا الدلال
يقدمن الاحبة والبنين لفوز بالشهادة في النـــــــــــــــزال
ويدفعن الاشاوس بالنشيد لخوض الموت في حرب سجال
ومابمهيرة الا مثال لربات كبرن على المثــــــــــــــــال
نعزك ايها الوطن المفدى وعزك اغـــــلى من نفس ومال
فأنت الآمر الناهي المطاع فقل لو شئت زحزحت الجـبال
نلبي لك النداء بإندفاعٍ كدفع السهم من وتر النــــــــــبال
ولسنا القائلين اذا دعينا لتذهب انت وحدك للقــــــــــتال
تعلمنا الشدائد كل يوم ونقتحم الشــــــــدائد لا نـــــــبالي
تزيد ضراوة ونزيد صبرا نبث الخوف في صدر الرجال
وكم متربص بك ذاق منا حمام الموت قهراً وهو قـــــالي
يسير النصر بيننا حيث سرنا ونحن له باصحـــــب وآل
فـيا وطني أحبك ما حييت احبك في مكوثي وفي إرتحالي
وأشهد ان لا وطناً ســــواك واشهد انك الشعب المـــثالي

[احمد كسلا]

سماحة عيونك

تشيلك تهاجر بلا إغتراب .. تثير في شعورك حلاوة العذاب
عجيبات عيونك عيونك عجاب
***
عيونك تحير عقول الشباب .. تعاين تغرود تقولك حباب
تقود لي عوالم الهوي المستطاب .. عيونك تعاويذ بتشفي المصاب
***
عيونك تشكل فواتح كتاب .. كتاب بين سجله الدعاء المستجاب
قلوب خاشعة تطلب جزيل الثواب .. دراويش ونوبه ومدايح شباب
***
مطيرة تبشر تبل التراب .. تساري وتفرح عطيش اليباب
يضاحك بريقا رواحل السحاب .. تصحي الأماني يخدر سراب
***
عيونك تجهجه فصيح الخطاب .. يحاول يعبر يخونه الصواب
يعاين رموشن تجذبه إنجذاب .. يصارع هواهن يكون فكره غاب
***
سماحة عيونك يقولوا الصحاب .. سماحة غنانا ونغيم الرباب
البفصل منانا وحديث كل باب .. (البشاهد) عيونك يكون غاب وجاب
***
سماحة عيونك رجوع للعقاب .. وكليمة أحبك تبروز خطاب
سمرنا وحجانا ولذيذ المطاب .. وقميرة فريقنا التتاوق الضباب
***
متين لي عيونك بتصبح قراب .. وأشوف الحنين في صفاهن مذاب
يشع فوق قليب بينه بينك حجاب .. يخاف التلاقي البعقبو الغياب
***
عيون في جمالن تسام الرقاب .. وعشانن يهونن قواسي الصعاب
سؤال لي جلالك يدور الجواب .. منو الشاف عيونك ورجع تاني تاب ؟

[احمد كسلا]

طريق الحب

ما غلطان طريق الحـب مشيتـو !!
اتعذبـت ايـه ذنبـي الجنيـتـو ؟؟!
طريقـا لاعرفتـو .. ولا دريتـو ..
لقيـت القبلـي سايرنبـو ومشيـتـو
يا جميل ليه بالهجر والصـد مليتـو
انا لارجع لي اولو ولا اخره جيتـو
***
النـاس البعـاد والفـي جــواري
مالن يحكو فـي سيرتـي وخبـاري
انا النيل والفـرات مابيطفـو نـاري
غـيـر لقـيـة حبيـبـا مالقيـتـو
***
مـاك عارفنـي سهـران الليـالـي
ليه تتابع ديل يحرموك من وصالـي
قلبك اسالو ان كـان يرثـي حالـي
وتعود للفـي سجـون الريـد نفيتـو
***
رسلـت السـلام يـا اللـي مفـارق
ليك يبقي حصن حصين من كل طارق
اذكرنـي بـيـه مــع المـشـارق
وقول ياحليلـو زول حـب وسليتـو

[احمد كسلا]

بــلا ميعـاد

بنتظرك بلا ميعـاد
بينك والأماني يطول رجا الفرح المشا وما عاد
تعالي مع الزمن موال أمدو على ليـالي السو
أدندن بيك للحجرات وللنسمه المباري النــو
أصفق والقمر يرقص مع الموج المراقص الضو
أطنبر بيك للأشواق
وأسمعك أي زول مشتاق
وأكتب لا القلم عاجز ولا يوم جف فــيه مـداد
تعالي ندرج الأيام على درب الهـوى الوحيد
نلملم من فراقنا كلام نلحنو في لقانا نشــيد
غيابك بح صوت الناي وراك تاهت غناوي الريد
طلي من الصباح اشراق
يراري على ندى الأوراق
يصحي عيون فراش حائــر على خفر الغصن الناد
تعالي بلا خبر برجاك على وقد الهوى المقدوح
وعلى الحزن البعاتب الهم وهـــــم روحا يسل الروح
يشحتفه ديمة بي أشواق بسيمتك والوشي المطروح
أنادي عليك من الأعماق
أشارف وجهك التـاواق
أشاشي على مدن عينيك وأرحل من بلاد لبـلاد
أدخلي ووزعي الأفراح على كل البيوت في الحي
وأبقي غنيوة القاعدين ومساديـر البشقو الصي
دا كان كلامي معـاك دا كان آخر حديثك لي
وقت كان الزمان حواق
قبل ما يجري بينا فراق
قبل ما تهب رياح البين وتكشح فوق وجوهنا سواد
بنتظرك بلا ميعاد موهدب الا كلي عشم
على عتب الأمل ساند ضهر صبري النقص ومـا تم
تعالي أيام زماني وحيد بلاك وشي حياتي سجم
بيني ولو على الآفاق
بدايات المطر نقناق
مطر فرحك على الأحزان حديثا تاني ما بنزاد

[احمد كسلا]

الطـرف المسهـد





يا زماني أحكي ليهم عن غرامي أنا كل مشهد
أحكي ليهم في الليالي كيف هو عاش طرفي المسهد
أحكي لي نخلات فريقنا لي طويراً فيها غرد
للجداول والسواقي وللدريب الليها ممتد
لي بحرنا ولي جروفنا للخدار الفيها فرهد
وللديار العشت فيها أنا قبلما أصبح مشرد
لي قويزاً شب يغازل في القمر طول ليلو يسهد
للجدار الراح يصارع في الزمان ما راضي ينهد
للرحل فارق غصونو وللصغار في عشو غرد
لي نسيماتن يهاجرن من شمالن يحملن رد
أحكي للساجعات حكايتي وللعيون الليلا هود
للبنوح طول عمره باكي وليه جمر الفرقه مرقد
وللبضم الشوق يسافر .. وليه دار أحبابه مقصد
لنجيماتن يساهرن لما ليل الغربه يتمد
أبقي زي وتراً حنين لصداه القلب ردد
غني مره وأبكي مره وأروي قصة حبي وأشهد
أحكي كيفن راد قليبي بسمته وخدو المورد
وكيف عبد بالشوق عيونه وفي دناهن عاش مشرد
كم صدح بي أسمو غني ردد الألحان وأنشد
في شقاه يقول غناه ومن غناه الناس بتسعد
يرسل الآهات حزينه وبي هموم الكون موسد
ليتو كان آهاتو تنفع لي جروحو الما تتعدد
تاه مع الأوهام مسافر .. في طريقاً غير محدد
عمره شمعه وزادو دمعهوبي حمول الشوق مهدد
ده السبح في لجه قارب .. وفي بحور الريده أبعد
لو يموت بالشوق تراه برضو لي أشعارو خلد

[احمد كسلا]

خوف ورهيبه


لابتالفي ولابتوالفي لاقادر منك اقنع
قريني مصاقر قرينك شقي الحال مابيرجع

حكايتي معاك جد غريبه اقولها والدنيا تسمع
افصل بيها القوافي واذينبها كل مقطع
اصل مرحلة التجلي مني شعري بيها يسطع
بلوت الناس في غناي لامن البحث صباحو يطلع

معاكي وقيعتي الطويلي شقاوت القلب الموجع
قساوت الايام علي وكت تابا عديل وتمنع
خوفي عليك خوفي منك شتات البال الموذع
نهايتها الله يقينك نهايت القيد المسبع

اقبل شقيش اقبل خيالك قدام بيتربع
اتوه في الدنيا العريضي القي صورتك في كل مربع
اجاهد واسرق خطاي افرهد خطواتي اسرع
من تالاك لي صداري تالاكي البال مخلع

اخاف من هيبة جمالك خوفت الخايف المروع
ولو في بشر يركعولو انا اول ذول ليكي بركع
ليه ما اعظم جمالك انتي عظمك الليكي ابدع
ولو يشوفك عاقل ذمانو تخلي اصغر من الشفع

اريدك يانور عيوني اريد فيكي واريد فيكلع
اريدك ذينة احلامي اريدك وفي قربك اطمع
عشان يوم خلقوكي انتي ماتخلق السماح لسع
دار الله موهدد من باب احذانا تنجع

قالولي بترجي شافعي قت ليهم لو بترضع
قالولي صفاك بايع قت ليهم ليها برجع
وصو ساكت توصو وصيتكم مابتنفع
شوف العين شن بسوي لي جايعا قصدو يشبع

[احمد كسلا]

الخاطره الثانيه



ديمه عليكي الريده تبين طولت ورجيك مستني
من غيباتك عودي تعالي قبال نار شوقك تكتلني
عودتيني اشوفك يومي واستسلم لي ؟؟؟؟؟؟؟؟؟
لما خلاص ادمنت هواك سقتي خطاك من بعدك عني
مهما قلتي ظروفك قاسيه برضو ظروفي تحتم اني
لابد من نسعي ونتلاقي واي حديث غير ده تجني
انا مافاكرك حلما عابر وماقايل رؤياكي تمني
جنة ريد في الخاطره بنيتها عشمان تبقي ذاهيه الجني
لاكين اه واه من صدك هسي اسبوع ماتسالي عني
وين حنيتك وشوقك لي لو كان صاحنك ذي حني
كم ارقني غرابك انتي واجري الدمع المابيوني
وينك والايام الحلوه لاشي غير جيتك شاغلني
اندهدهتي ودهدهتيني متوهدد بين شكي وظني
لاشكا اقنعني اسيبك لاظنا في رجاك وصلني
ماني براي مليان بالوحشه حتي ذهور الروض متاني
واي مكان طافتبو خطانا مشتاق ليك وعنك يسالني
يبدا سؤال الذول الحائر مقلوب في الامر المحني
كيفن اقدر اطمن غيري وطيفك لاعاد لاطمني
فيكي ذرعت الامل الاخضر ياريت الايام تمهلني
واقدر اوفي العهد البينا نتشابك والدنيا تغني
تهدي لي جميل احساسك اهدي ليكي روائع فني
مابين قلبا داب في حبك ورهشة ايد بالفرحه تهني

[احمد كسلا]

عتـــــــــــــــاب

تقدر تقول لى تعتذر أيه الحماك ؟
تكتب ترسل لىّ ولاّ جفيت براك ؟
***
وين رسايلك لىّ عاد .. قول لىّ يا أجمل ملاك
ما مرّن إسبوعين تمام انا فى إنتظارك وفى رجاك
ما كان فى داعى عشان أقول ما انت عارف الحال براك
يرضيك أكتم الريد واموت ولا انفضح للناس وراك
***
كلما تجينى رسالة اقول ياروحى زولك دوب طراك
تقلدنى قوّى من الفرح وكتين أقول جوابا جاك
لكن فرحنا يعود دموع وألقاه تب ما خط يداك
ساكت بلا بالشوق عليك شحتف رويحيى المشتهاك
***
ولا انت خلاص نسيت العشرة لمّا رحل هناك
ونسيت قليب كان ليك رفيق ياحليل خُطا السارِن معاك
ما كان بيتمناك سعيد ما كان بيشقى عشان شقاك
ومن حبه ليك بس ما فضل غير فى التراب يحضن خطاك

***
والله لو تسأل على أنا حالى بعدك حال عِداك
دنيايا ما زارها الصباح والنوم جفانى رحل معاك
وزمانى اقولو كفاى هموم يرجعلى تانى يقولى هاك
ياهو المقدر ياحبيب والدنيا مابتديك رضاك
***
أنا غايتو ناذر حبى ليك لا يحب ولا يعشق بلاك
حتى إنبقيت بالحب ودِر وشارف على درب الهلاك
ما دام سعادتى بشوفا فيك .. ما دام حياتى بقت هواك
فى الدنيا أحبك للممات وفى الآخرة برضى كمان معاك

[احمد كسلا]

العشق المجنون






بين جنتك ونارك مسافات العذاب

السرتهن يوم نادى حسنك للهوى وقلبى استجاب

يا غايبة فى الزمن الهجير رمض مسار عشمى الغياب

صنقر حرس ذرة رجاك طرحت مع الايام يباب

وشلن عيونى عليكى شوق المِحنة والهم والسحاب

لمن لقيت المستحيل وآصّد عليك تالايا باب

ناديت عليك بين حرقة الشوق المدودى على نواصى الاغتياب

كان تبقى لى شكواى سميعة وكان دعاى عندك يجاب

ورجع الصدى وشكواى والأنة الطريحة على سليكات الرباب

ونقشن مجيك مطلع قصيدة على جدار الإكتئاب

يا منتهى العشق الجنون واحرف بداياتك كتاب

عنوانو استفهام سؤال غائب يفتش فى جواب

مين علمك فينا الرحيل دون ما نفكر فى الإياب

مين عودك فينا الخطاء وقال ليك فى شرع الحب صواب

أنا ما هويتك للمواجع وضحكة الأمل السراب

لا و لا عشقتك للأسى وأسفو اليمطقنى التراب

كان ظنى والشك اليقين وخجل الأمانى من العتاب

نتلاقى فى العمر السمح نحيا ونعيشو قراب قراب

راجيكى حارس الفرحة تنزل قفلة فى القلب الخراب

وراجيكى لا اتكمسد بساط الشوق ولا انقطع التباب

وراجيكى لما ايقنت انى اهواكى فوق كل الصعاب

وراجيكى و الواقع العلى وقع المصيبة على المصاب

الله على الأمل السرق قدلات شعاعك لينا من خلف الضباب

لو مات بعد طول السنين عوبس على الافاق خضاب

والله اذا كذبت وعود يا وعدى من زهو الشباب

والله اذا صدق اللقاء وفى العمر ما فضل عقاب

[احمد كسلا]

ياشمعه





فى جنح الظلام انا وانتى والحزن العميق يا شمعة

استجدى من نورك امل تستجدى صبرى من الحريق

ينشر فى الافراح ضياك وانتى الفرح منك بعيد

تذوبى فى ذاتك دموع زى ما بنذوب فى الريدة ريد

تتلاشى فى رقصة عدم فى حضرة الجمع السعيد

يرحل وميضك وتنطفى زى بسمة مات فيها البريق

زيك انا المشعول حسار جفت سقاى والدنيا رى

رامينى شوتال الزمان تتفرج الايام على

شابيت لى لحظة فرح ضيعت ما كان بين ايدى

وصلت احلامى النجوم رجعت فراشة بلا رحيق

غذيت سعن الحن حنين وكتين شخيب الحِن غرز

قلبت ماضى وحاضرى زين فى الذهن واحد ما انفرز

اقتل همومى وادفنن القاها بكرة غرز غرز

فى غربة العمر الضنى التمشيهو لا زاد لا رفيق

وانا بين بكاى على شقاى وتساقط الاقدار بلى

اضحكنى حنديك المنى وفى حال جرابها غليت غلى

بكيت والبكى ما اراح وضحكت زاد العين ملى

وفى لجة الاحزان تعوم آمالى زى قشة غريق

لويحة الفرح الحزين فى هزعة الضحك البكى

فضحت عذابات السنين فى خاطرى دون حكى او حكا

يوم اتكلت على الصبر ميل على شعبو انتكى

عصفت امانيا الرياح تزروها فى الوادى السحيق

كم شمعة فى ليل انطفت ولسه الفجر ما لاح وشى

كم مرة فيهو احى واموت لى المتلى لا يعنيلو شى

كأنى ادمنت العذاب وامسى العذاب بى ينتشى

دنياى خطوط متقاطعات كل الزوايا على تضيق

[احمد كسلا]

بدر البدور






الليلة وين سافرت يا بدر البدور

ما أظنو قلبي وراك تاني يكون صبور


ما كت فاكر نتفرق ما كان ده في ذهني بيدور

ما كتّ بقول جنتنا ديك تزبل تجافيها الطيور

يسكت كنارا الكان يغني ويقلب الآلام سرور

ترجع فراشاتنا القبيل معتاده بي قبل الزهور



الليلة ما جات الرياح تحفر تقلع في الجذور

وكمان ينوح البوم سكن وفوقا الغراب حلق يدور

ما خلاص خلاص ضاع الأمل وأتهدا بنيان كم شهور

وإتبدلت بسماتنا دمعات حارة وأتقلب الشعور



ما فاكر الأيام تخوني والقدر يبقالي سور

ما فاكر أنت تروح بعيد انا ليك ما أقدر أزور

ما فاكر أحتاج للزهور وكان كفي كلو ملان زهور

وما فاكر أفقد فيك امل وانا عندي في الآمال بحور



ما فاكرك إنت بتجفي يوم قبال ده ما كتّ نفور

كيفن قدرّ بدلت طيبتك يا حبيبي بقيت تجور

وكيف هان عليك محيت صفحات من عهودنا مدادا نور

خليتني أجدد فيها تاني وبالدموع أكتب سطور



خليتني زي إنسان غريب حيران بيسأل كل زول

وزمناً قضيناه الجهل فوق قوز رمال وسط التمور

ما ألقي لي جيتك خبر وما ألقي لي دارك رسول

وأرجع حزين طاوي الألم وزمن الفراق يمتد يطول



وكتين عرفت محال أراك بقيت أكوس شبهك وادور

كان الشبه يروي العيون أو يسكت الجرح البغور

شبهت محياك بالقمر ومحياك فاقو كمال ونور

سبت القمر شلت الزهر وما إنت أندي من الزهور



أحسب سواد عينيك ليل لكن سواد الليل بزول

وبرضو الصباح جاب لي عبير لكنك أحلي من العطور

إحترت وين ألقي الشبه وشبهك ندر مر الدهور

كان قصدي لو في النوم أراك النوم بقالي وراك ضرور



كيفن يضوق الغمدة زولاً جسمو بالنيران يفور

نوثربو جرحو رقد عليل لشفاه صعبتلو الأمور

ليلو ونهارو بكا ونحيب شاهدالوا نجمات السحور

صابر السنين لو كان صبر ما بصبر الألم الصبرت عليهو دور



تابعت ناس فارقتني وعارفاني لي شوفتك غيور

وعاهدتني إنك ما بتغيب والليلة تاباه الظهور

دايرني اصبر لي متين وين الصبر لي زول بيلعن حظو لا يوم النشور

لو تاني عاد ليهو الصبر كان عادوا سكان القبور

[احمد كسلا]

الخاطرة الأولى




يـا حلـمـى القـبـال نتـلاقـى طمـنـى قلـبـى وكـونـى معـاي
أنا راجيك اتنين فوق عشـره هـدّن صبـرى كفايـه كفاي


كلمـا تبـعـدى عــن عيـنـى احــزن اخــاف ماتبـقـى نهـاي
فكـرى يقـول لـى مابتلقاهـا وقلبـى يقولـى صباحـك جاي
وبيـن وعـدك والشـوق واللهفـه فوقـى الهـم ينشـر تخـاي
وأسـأل أقـول يـارب جنيـت ولاّ كمـان دى الريـده بـداي


أنا وحياتـك دون مـا اشعـر ألقـى عليـك سابقانـى خطاي
لـى لقـيـاك يــا أغـلـى هـديـه أرسـلـك الــرب لــى دنيـاي
نتلاقـى و تتلاقـى الفرحـه وترسـم معنـى هـواك وهـواي
واصلو الحب لمـان يتجسـد فـى العينيـن مابدورلـو قرايـه


انت الخاطـره الشغلـت عقلـى واجـت نـار الشـوق جوايـا
ما متخيـل يـوم نتصـادف وتصبحـى واقـع اعيشـو برايـا
رغـم سنيـن العمـر الضاعـن وانـت بعيـده علـى مسعـايـا
يـلا او رينـى سعادتـك لـىّ وا مسحـى مـن عينـىّ اساي


فيـك بشـوف حنيـة بلـدى وفيـك بـشـوف اهـلـى ومأتـاي
واتمنـاك كـل لحظـه تـعـدى فيـهـا تكـونـى قريـبـه حـداي
اتأمـل فـى ليلـك وصبحـك وزهــرك والبسـمـه الضـواي
يملا وجودى حديثك نشوه وروحى تحلق فوق فى سماي


لا تتـأخـرى فــى غيبـاتـك شــدى خـيـول شـوقـك تـالاي
وابنـى لـى فـى حضـك جنـه , جـنـه افـجّـر فيـهـا غنـاي
لا تنـسـى العـهـد البيناتـنـا الشـاهـده علـيـه يــداك ويـداي
يا ما كتير ضحيت من اجلك اوعك صـدك يبقـى جزاي

[احمد كسلا]

وطني التاريخ


وطني قلبك وقبل قلبك ولا غرابه
يلا يا تاريخ اقيف اسمع معاي ابدا الكتابه
طوف بلدنا من البدايه وللنهايه
من شروقه ولا غروبه من شماله ولجنوبه
كل قريه كل مدينه تلقى بلدي على الهدايه
تلقى في اللوح والدوايه
في ترانيم راعي بمزمارو يعزف وحولو سرحات السعايه
يلاا يا تاريخ اقيف اسمع ومعاي ابدا الكتابه
تلقى في الدوبيت وقت يحلى ويشق الليل مع ناس مهوي ليلا فوق ضهر المطايه
يا سماحه بت بلدنا الفي المكاتب وفي المصانع وفي الفصول بهمه شاغلاها القرايه
يلاا يا تاريخ اقيف واسمع معاي وابدا الكتابه
وطني سك سك لابسه مريم وفي اضان كلتوم فدايه
وفي حنان ام مقالدي وليده في اللولايا تقولو ان شاء الله تكبر يا جناي
في كلمة الطيبه كلمة وا شريري وجيت من وين يا جنايه
في حنين اهلي الغبش اهل الدباره واهل الدرايه
ويلا يا تاريخ اقيف واسمع معاي وابدا الكتابه
وطني الطيبه والاخلاق وقيدا للرجال خناق وطني كرم يوشل مي سحابه
ياهو مننا ويانا منو ولا غرابه ولا غرابه
يلاا يا تاريخ اقيف واسمع معاي وابدا الكتابه

[احمد كسلا]

ليمـــــــــــــــــــــة


تعذب واقـول تسعدنـى منَّـك يـا جميـل يـوم ليمـه
يتبـدل جفاكـى محنـة وهجرانـك يزيدنـى عزيـمـه
آمالـى البنيتـا عليهـا مالـى الليـلـى دُر تحطيـمـه
كيف غيرك أعيش فى الدنيا غيرك كيف يطيب لى نعيمـه
عارفة الفرقة نار فى ضلوعى كيف يرضيك أصالى جحيمه
أرحم سيب صدودك حبى يامـا عليـك قلوبنـا رحيمـه
إيـه فايـدة شقايـا وهمـى وعينـىَّ البكـبـن ديـمـه
ساهرى مع النجوم ترعاها تبكـى شبابـا تنعـى قديمـه
تبكى تقـول حليـل الماضـى محتـارة وجفاهـا نديمـه
كل ما أقول أكف دمعاتا ألقـى دموعـا جاريـة هميمـه
جابتنـى المقاديـر ليهـا فـى البيـت القصـادو النيمـه
لابسة الطرحة تقدل بيها ذوق وجمـال وطلعـة وسيمـه
مخلوقـة تـراب الجنـة والطيـب خالطوبـو جسيـمـه
كان حاكى القمر محياهـا لـو مـا فـى القمـر ضلِّيمـه
عش فى الدنيا ما شُفْ غيرو نـور فـى داخـل البليمـه
فى خديها شاهد روضـة فايحـا عطـورا جابـا نسيمـه
ديسا هدل كثيف وتجرو كـل مـا تمشـى ياطـا قديمـه
إن بسمت تشوف فى سنونا برقـاً يحكـى بـرق الغيمـه
آه أنا من قنابلو صديرا روحـى أصبـح عليمـا كريمـه
من نظرات عيونو الجارحى قلبى خِرِّبْ خـراب لا ديمـه
حبها شال سحب عقليتى مـا ظـن تانـى تبقـى سليمـه
أشكى لمين وأصارح مين الحـب عنـد أهلنـا جريمـه
كت فاكر بحـورا بعومـا لكـن صوبـت بـى الشيمـه
لى بر السلامة تعود بى يا الـزرع العنـب فـى خشيمـه

[احمد كسلا]

كوسيلي الخلاص


كوسي لي الخلاص من بدري في حبك ترانـي غــرق
عارف نفسـي مابلقـــــــــــاكي سـاكت فيـك متعـلق
قالوا الدنــيا يامحــــبوبة تجمـع يوم ويوم تفـرق
بس نان مالا مابتجمــــعنا والله ده ماهو متحـقـــق
صـــح ماليها أمان واللــه لي مضـيقي المشِـــــــقّ
مادالي اليمين تضحـك لي وبي إيـدا الشـمالي تعـق
هـــاك شكوايا يا محبــــوبة لو قلبك علي يــــــــرق
ديل أربـع سنين متــواري من محني وشقاي ما فق
خوفي شقايا قبل ألقــــاكي يمحق لي عميري محـق
وأجيك ساير علي الأكتـاف عزب لا حني لا جــرتق
آه من دنيــتي وأقــــدارها ينصـبـقن علي صـــبـــق
وساقة الهم تسوق في راسي تتعــــاقب بلا تتـــــــق
بس تحـريني شن سويتا غيـر زول لي عيونو عشـق
لمن اشــوف حياتي الغالية ليلا صبحو ما بشــــرق
ساعة الناس تنوم تتهـــني والعين للمنـام تســــــرق
ألقي رويحتي فوق المـــلي شقيش ما انقلب بي شـق
الله من عبرتاً ســــــــــادي وارداً للقليب بتشـــــــــق
والله من دموعـــــاً نازلي ينجــارن بلا ميرتـــــــق
دار انساكـي عــــارف قلبي للغير حــبو ما بطـلـــــق
منك لو أموت كل لحظــــــة بالريد قلبي ليك يخفـــق
ما بنساك عشان كملت صبري ولي حدودو لحـــــــق
إلا الريد تعقبو عــــــــدواة وليكي أنا من عدواتو شفق

[احمد كسلا]

زغـــرودة

زغردي يمه في البلد البعيدي .. جابو لي وليد والليلة عيدي
***
أنا الراجيهو زمناً مو قريب .. أشوفا طفولتي في وجه الرحيّب
دا ماهو الأبله الدايماً مغيّب .. عشا أماتو قنّاع أم سبيّب
***
ولداً لي أبوه يكون ضراعو .. يا سلام في روقته وأخلاقه وطباعو
يرجّع لي سنيني المني ضاعو .. كلامو اليجبر الزول لاستماعو
***
ماك الصار وشيهو ويوت مكشّر .. ومن المده كفك ما بيقصر
عشيمك تلفا في اليوم المعسر .. وتصبح وتمسي فوق خيرك تبشّر
***
إنت نسل الما بيضيمولن ولايه .. ناس الفاتحي واللوح والدوايه
خلاويهن معمره بالتلايه .. ومريضن يشفوا بي رشة محايه
***
جدودك في الفتيح راقدين سويه .. وأبوك ود موسي هوان البله
أبوك الكنّيابي أسد البنية .. وأماتك غبيشي بتد رويه
***
يجوك من أوسلي قاطعين الفيافي .. يقولوا ولدنا ما دلا وعوافي
فوق راسك يذكروا أسم الله كافي .. وجسيمك يمسحوا ويملوهوا عافي
***
تكبر أنت ياعكاز عمايا .. وراكوبة مقيل ضلي وضرايا
تخلفلك عشرتولاد صبايا .. تعيش المية مية .. ومية جايا

[احمد كسلا]

أبكن ياعيون


الليلة أبكن ياعيون ... كتر وحيحك ياقلب
وينو الزمان يهدي الحنان ... من غير وداع راح محتجب
***
ليه يابا راحل دون وداع ... ما قلت من دنياك تعب
دايرنا نحن نعيش وراك ... كيف بي قليباً .. متخرب
ولا القدر جبرك تسيب ... ناس ليها ياما كت تحب
في الحسرة والأسي الهموم ... والعبره والدمع البكب
***
غشاشة .. يا دار الزوال ... كل النعيم الفيك كذب
كل ما تجودي الناس بخير ... يلقوه .. شرك متقلب
يادنيا ليه بتشيلي أبوي ... يادنيا حار جرح القلب
ما هسّ كان بيناتنا نور ... واليوم دريبو علي صعب
***
مابيرحم الموت يابا زول ... دايماً .. مسلط للسلب
أتام عيال .. خراب ديار ... بكاي عيوناً تنتحب
هو القدر .. هو الآجل ... هو المسطّر ومتكتب
رغم العلوم إتقدمت ... ياموت دواك ما عرفو طب
***
جاني الخبر في يوم رهيب ... في نفسي أشوفو كذب كذب
غشوني يابا وقالو لي ... راجيك أخوكي المغترب
يابا .. ما شفت العلي ... لمن عرفتك أنت غب
الكون ده شفتو عكس بعض ... حتي الشمس طلعت غرب
***
جيت للديار مافي بال ... البال وراك تب منشطب
جيت للديار وطعم الفراق ... في حلقي مرّ مراً كعب
جيت للديار ابكيك ودمع العين ... يسيل يسكب سكب
يا أبويا وآ أسفي الشديد ... ما جيت قبال .. تنترب
***
روحت ما خليت غير ... ذكري المحبين للمحب
ذكراك مقدسة في قليب ... أرضعتو حنين القلب
ذكراك رسمتها في الخيال ... بين النجوم في ليل ضهب
ذكراك دايماً في صحاي ... وعليها من النوم أشب
***
بذكرك عند الصباح ... مندلي للمزروع تقب
وبذكرك نصف النهار ... في نومه والنسام يهب
بذكرك عند المغيرب ... جاي طالع بالدرب
بذكرك في كل صلاة حتي ... الجمع حين تسمع الآذان تتب
***
الهي أبوي عندك غريب ... أغفر لو كل ذله وذنب
وارسل سحاب الرحمة يوت ... فوق قبرو يتزاحم يكب
وتأنسو بحرواً حسان ... لا تتوصف .. لا بتحسب
وأقبل \عاي قول لي أبوك .. في الجنة لا شقا لا تعب

[احمد كسلا]

عيونك ديل


عيونك ديل قليبي هن الأذنو .. ربي يسامحك كان عذبنو
***
مسكين في بحور الشوق رمنو ... تايه فوق دريبن ودرنو
مظلوم في الغرام ما أنصفنو ... وكمان ناوات عميرو يقصرنو
***
جافاهو المنام كم سهرنو باكي ... البيه ناح والحولو غنو
باكي الماضي والدمعات رونو ... كيف يعود ماضيه والأيام طونو
***
خلنو ونسن ريدتو ونسنو ما ... راعن ودادو وقدرنو
لا جادن عليه ولا طرنو ... ولا يوم في لماتن عشمنو
***
وروني الحصل إيه سمعو عنو ... وبس ليه السلام قطعنو منو
مات بالشوق عليهن ما بكنو ... وما أظن فـ تريبتو يريحنو
***
بقيت أبكي وبكاي الناس تظنو ... تقول ود أبنعوف عاد ليهو جنو
ما بكيت تعذيبي عارفو مقدرنو ... إلا بكاي علي قليبي الحطمنو
***
انا العارف عيونك ما بحنو ... لاون قليبي لامن فترنو
يصارع في الرموش متل التكنو ... قويرب جنو موجات غرقنو
***
يجيه الليل طبول الهم يرنو ... ويسوق سوقار مصايبو يكابرنو
إنت باقيلك بيسعد ؟ ما أظنو ... ياهو شقاه منك وإلا منو

[ود قنــوب]

( مين علمك فينا الرحيل دون ما نفكر فى الإياب )
الرائع احمد عبدالحميد كما يحلو لي احمد كسلا كما تود
لك ملايين التحايا
من دون شك نقدر فيك هذا الجهد المبذول وانت توثق
للقامة / ابراهيم ابنعوف
وما قدمه هذا الجميل للأغنيه الشايقيه وقد كان وما زال
احد مرتكزات اغنية الطمبــور .. لك التحيه اخي احمد

[عزالدين علي احمد رحمة]

نشوف غرويدة عيونك نقلك يا نايمة اصحي نودر وننسي ان ناعسة وناعس الله منو البصحي ..................تعجبني اوي كتابات القامة ود ابنعوف لك التحية اخي احمد ويا ريت كل توثيق يشمل اولا السيرة الذاتية للشاعر ....سيري يا اقداري سيري وسيري بي محل تسيري شن يهمك بي عذابنا اصلي زول مجهول مصيري

[احمد كسلا]

تسلم ودقنوب "ف ا ع س أ" علي المداخلة الرائعة
الزعيم عزالدين تشكر علي المرور الجميل
إنشاء الله نكون قدر ثقة المنتدي

[عزالدين علي احمد رحمة]

ربنا يوفقك يا ود كسلا بس لاتقيف .................. المكتبة دي ماها ساهلي

[احمد كسلا]

في زمتك يا عز الدين لقاك بيت زي دا


مخلوقـة تـراب الجنـة والطيـب خالطوبـو جسيـمـه
كان حاكى القمر محياهـا لـو مـا فـى القمـر ضلِّيمـه

[عزالدين علي احمد رحمة]

والله يا قول العدو ..........نضم وحات الختم ..... اهلنا مبدعين حقيقة والله في الزايلي يريحوك لامن تقول كفي